برطانوی  شہزادی لیڈی ڈیانا کی کردار کشی پر مبنی اسکرپٹ کے سبب جمائما خان نے  نیٹ فلکس  شو ’دی کراؤن‘ کے خالق ٹونی مورگن کے ساتھ بریک اپ کے بعد شو کی حمایت  بھی واپس لے لی ہے۔

47 سالہ  جمائما خان کوشو کے مصنف ٹونی مورگن کی مشاورت کے لیے رکھا گیا تھا تاہم  انہوں نے   شوکے اسکرپٹ کا کریڈٹ لینے سے بھی انکار کردیا کیونکہ شو کی کہانی  میں ڈیانا کے کردار کو عزت و احترام سے نہیں دکھایا جارہا تھا۔

جمائما خان نے مورگن کے ساتھ گزشتہ سال ستمبر سے اس سال فروری تک شہزادی ڈیانا کے ہارٹ سرجن  حسنات خان اور دودی فائید کے ساتھ تعلقات  سمیت مارٹن بشیر کے ساتھ سنسنی خیز انٹرویو جیسی کہانیوں پر مل کر کام کیا تھا۔

دوسری جانب ’دی کراؤن‘ شو کے ترجمان کا کہنا ہے کہ جمائما خان آغاز سے ہی شو کی پرستار اور حمایتی رہی  ہیں تاہم ان سے کبھی بھی بطور مصنفہ معاہدہ نہیں کیا گیاتھا۔

واضح رہے کہ  پاکستان کے موجودہ وزیر اعظم عمران خان کی سابق اہلیہ جمائما خان اب اپنی فلم پروڈکشن کمپنی چلاتی ہیں ۔

عمران خان اور جمائما کی شادی 1995 میں ہوئی تھی تاہم دونوں میں 9 سال بعد طلاق ہوگئی تھی۔

شہزادی ڈیانا نے 1996 اور 1997 میں دو مرتبہ اس جوڑے کی دعوت پر پاکستان کا دورہ کیا تھا۔