بالی ووڈ کنگ شاہ رخ خان کے بڑے بیٹے آریان خان کے منشیات کیس میں نارکوٹکس کنٹرول بیورو (این سی بی) کا اہم گواہ پربھاکر سیل کی دل کا دورہ پڑنے سے موت ہوگئی۔

بھارتی میڈیا رپورٹس کے مطابق پربھاکر سیل گزشتہ روز دل کا دورہ پڑنے کی وجہ سے چل بسے جبکہ اُن کی موت کی تصدیق ایڈووکیٹ تشار کھنڈارے نے کی جو ان کی نمائندگی کر رہے تھے۔

پربھاکر سیل منشیات کروز شپ کیس میں ایک اور گواہ کے پی گوساوی کا ذاتی سیکیورٹی گارڈ تھا جس میں بالی ووڈ سپر اسٹار شاہ رخ خان کے بیٹے آریان خان کو سب سے پہلے گرفتار کیا گیا تھا، تاہم گوساوی نے آریان کے ساتھ ایک تصویر پوسٹ کی تھی اور یہاں تک کہ اُنہیں آریان خان کا ہاتھ کھینچتے ہوئے این سی بی کے دفتر لے جاتے ہوئے بھی دیکھا گیا تھا۔

بعد ازاں مہاراشٹر کے کابینہ وزیر نواب ملک نے گوساوی جیسے پرائیویٹ فرد کو کیس میں گواہ بنائے جانے کا معاملہ اٹھایا اور پوچھا کہ گوساوی آریان کو این سی بی کے دفتر میں گھسیٹ کر کیا کر رہے تھے۔

دوسری جانب پربھاکر سیل نے دعویٰ کیا تھا کہ اس نے این سی بی کے زونل ڈائریکٹر سمیر اور گوساوی کی مبینہ ادائیگی کے بارے میں گفتگو سنی ہے اور یہ انکشاف بھی کیا تھا کہ کروز پارٹی میں این سی بی کے چھاپے سے قبل ہی کے پی گوساوی کے پاس 10 لوگوں کی ایک فہرست موجود تھی جنہیں نشانہ بنانا تھا۔

اُنہوں نے اپنے بیان حلفی میں بتایا تھا کہ اسے گواہ بنایا گیا تھا اور اسے بغیر بتائے ہی 10 سادے کاغذوں پر دستخط کروائے تھے اور جس وقت یہ کارروائی ہو رہی تھی، اس کے پاس آدھار کارڈ بھی نہیں تھا۔

پربھاکر سیل کی چیٹ سے یہ بھی انکشاف ہوا تھا کہ اس نے اپنا آدھار کارڈ این سی بی ملازم سمیر کو بھیجا تھا۔

واضح رہے کہ اکتوبر کے اوائل میں آریان خان کو ممبئی کے کروز پر منشیات کے معاملے میں گرفتار کیا گیا تھا اور کئی عدالتی سماعتوں اور 26 دن کی طویل حراست کے بعد، بمبئی ہائی کورٹ نے 28 اکتوبر کو آریان کو ضمانت دے دی تھی۔

آخرکار وہ 30 اکتوبر کو اپنے والد کی سالگرہ کے موقع پر جیل سے باہر آگئے تھے۔