بالی ووڈ کی متنازع اداکارہ کنگنا رناوت نے فلم انڈسٹری سے شکوہ کرتے ہوئے کہا ہے کہ کسی اور اداکارہ کو آج تک اتنی منفیت کا سامنا نہیں کرنا پڑا جتنا کہ مجھے، میرے خلاف پروپیگنڈہ بڑھتا جا رہا ہے۔

بالی ووڈ اداکارہ کنگنا رناوت نے اپنے انسٹاگرام اکاؤنٹ کی اسٹوری پر ایک رپورٹ شیئر کرتے ہوئے اس کی مذمت کی ہے۔

اس رپورٹ میں دعوی کیا گیا ہے کہ 2015ء میں کنگنا رناوت کو شبہ تھا کہ سنی دیول کے ساتھ فلم ’آئی لو نیو ایئر‘ میں کام کرنے کے بعد اِن کا کیریئر ختم ہوجائے گا۔

رپورٹ میں  مزید دعوے کرتے ہوئے کہا گیا ہے کہ جب فلم ریلیز ہو رہی تھی تو کنگنا کو لگا کہ یہ فلم ان کے کیریئر کو تباہ کر دے گی اور اسی لیے کنگنا نے اس فلم کی ریلیز کو ناکام  بنانے کی بھی کوشش کی تھی۔

یاد رہے کہ اداکاروں نے 2015ء میں یہ فلم ایک ساتھ کی تھی جس کی ہدایتکاری ونے سپرو اور رادھیکا راؤ نے دی تھی، فلم نے باکس آفس پر کوئی خاص بزنس نہیں کیا تھا۔

اب اداکارہ نے ان دعوؤں کی مذمت کرتے ہوئے کہا ہے کہ وہ سنی دیول کی بہت بڑی مداح ہیں اور اُنہوں نے فلم ’غدر 2‘ کی بڑے پیمانے پر افتتاح کی پیشگوئی بھی کی ہے۔

کنگنا نے کہا ہے کہ فلم ’غدر 2‘ سال کی سب سے بڑی اوپننگ فلم ہوگی۔

انہوں نے مزید کہا ہے کہ اِن دعووں کا مقصد میرے اوپر کیچڑ اچھالنا ہے، میرے علاوہ کسی اور اداکارہ کو روزانہ کی بنیاد پر اس قسم کی منفیت کا سامنا نہیں کرنا پڑتا۔

اُن کا کہنا ہے کہ جو لوگ مجھے جانتے ہیں یا میرے ساتھ کام کرتے ہیں وہ سب متفقہ طور پر ایک بات کہتے ہیں کہ میرے بارے میں میڈیا میں پتہ نہیں کیوں اتنا خوف ہے پھیلا ہوا ہے۔

کنگنا رناوت کا کہنا ہے کہ اُن سے مداح اور اُن کے لوگ بہت پیار کرتے ہیں، اس کے باوجود اُن کے خلاف دن بہ دن پروپیگنڈہ بڑا ہوتا جا رہا ہے۔

کنگنا رناوت نے  ایک رپورٹ بھی شیئر کی ہے جس میں اِن کی فلموں کی فہرست درج ہے جو کہ باکس آفس پر کامیاب نہیں ہوئیں۔

اُن کا یہ فہرست شیئر کرتے ہوئے مزید کہنا تھا کہ ہر روز 10 سے 15 آرٹیکلز یہ بتاتے ہیں کہ میری تمام فلمیں فلاپ ہوتی ہیں یہاں تک کہ وہ بھی جنہوں نے 150 کروڑ کا بزنس کیا ہے اِن سے متعلق بھی جھوٹی خبریں پھیلائی جاتی ہیں۔

اداکارہ نے مزید کہا کہ میں فلم مافیا سے ناراض نہیں ہوں, میں صرف سوچتی ہوں کہ خدا نے اِنہیں کس قسم کی مصیبتیں عطا کی ہیں، اس شدید عدم تحفظ اور پریشانی کے ساتھ زندگی گزارنا کتنا مشکل ہوگا، کیا یہ لوگ جہنم کی زندہ مثال نہیں ہیں؟

واضح رہے کہ یہ پہلی بار نہیں ہے کہ اداکارہ نے فلم انڈسٹری سے گلا شکوہ کیا ہو، اس سے قبل بھی کنگنا رناوت فلم انڈسٹری میں خود کے ساتھ ہونے والی ناانصافیوں سے متعلق بات کر چکی ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے یوٹیوب چینل کو سبسکرائب کریں  https://bit.ly/3Tv8a3P اور بیل آئیکن پر کلک کریں