عربی زبان میں بننے والی فلم ’’ووئے ووئے ووئے‘‘ پاکستانی سینما گھروں میں ریلیز کردی گئی ہے جس کی کہانی بہتر مستقبل کی خاطر بیرون ملک جانے والے خواہشمند نوجوان کے گرد گھومتی ہے۔
لاہور میں عربی زبان میں بننے والی مصری فلم ’’ووئے ووئے ووئے‘‘ کے ڈائریکٹر عمر بلال، پروڈیوسر محمد حیفظی نے بذریعہ زوم جب کہ ڈسٹریبیوٹرز نے مقامی سینما میں میڈیا سے گفتگو کی۔
فلم کے بین الاقوامی ڈسٹریبیوٹر وکس سینما کے ایم ڈی ٹونی ال مسیح کہتے ہیں کہ ’’ووئے ووئے ووئے‘‘ فلم نے ریلیز کے ساتھ ہی بین الاقوامی مارکیٹ میں بھرپور پزیرائی حاصل کی ہے۔
انہوں نے کہا کہ خوشی ہے کہ فلم کو آسکر ایوارڈ کے لیے نامزد کیا گیا ہے، کوشش ہوگی وکس سینما جلد فلم پروڈکشن کی طرف بھی آئے اور خواہش ہے کہ پاکستانی تعلیمی اداروں میں جاکر نوجوان فلم سازوں سے ملاقات کریں۔
فلم کے ڈائریکٹر عمر بلال کہتے ہیں کہ فلم ’’ووئے ووئے ووئے‘‘ کی کہانی حقیقت پر مبنی ہے۔ کرداروں کو نبھانے میں فنکاروں نے بے حد محنت کی، جاندار اداکاری اور منفرد کہانی کی بدولت فلم کو عالمی سطح پر سراہا جارہا ہے۔
پروڈیوسر محمد حیفظی کا کہنا تھا کہ فلم کی خاص بات اس کی کہانی ہے۔ فلم کے ذریعے غیر قانونی طور پر بیرون ملک جانے کی کوشش کو دیکھایا گیا ہے۔ فلم میں ایکشن، رومانس اور کامیڈی سب شامل ہیں۔
عربی فلم ’’ووئے ووئے ووئے‘‘ کے پاکستان میں ڈسٹریبیوٹر حماد چودھری نے کہا کہ ایچ کے سی پاکستان میں فلموں کا سب سے بڑا ڈسٹریبیوٹر ہے۔
ان کا مزید کہنا تھا کہ عربی زبان میں فلم کو پاکستان میں لانے کا مقصد ایسی کہانی کو لوگوں تک پہنچانا ہے جو حقیقت سے جڑی ہو۔ مستقبل میں بھی عربی زبان میں مزید فلموں کو پاکستانی سینما گھروں میں لایا جائے گا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News