ممبئی: بالی ووڈ اداکارہ وانی کپور کے انسٹاگرام اکاؤنٹ سے ان کی پاکستانی اداکار فواد خان کے ساتھ آنے والی فلم ‘ابیر گلال‘ سے متعلق تمام پوسٹس اچانک غائب ہوگئی ہیں، جس کے بعد سوشل میڈیا پر چہ مگوئیاں شروع ہو گئی ہیں۔

اداکارہ نے حالیہ ہفتوں میں فلم کی پروموشن کے سلسلے میں متعدد تصاویر اور ویڈیوز شیئر کی تھیں، جنہیں اب ان کے انسٹاگرام پروفائل پر نہیں دیکھا جا سکتا، یہ اقدام بغیر کسی اعلان یا وضاحت کے سامنے آیا ہے، جس پر مداح حیران ہیں اور مختلف قیاس آرائیاں کی جا رہی ہیں۔

دلچسپ بات یہ ہے کہ وانی کپور کی فلم ‘ابیر گلال’ سے متعلق پوسٹس مکمل طور پر حذف نہیں کی گئیں بلکہ صرف بھارت میں محدود کر دی گئی ہیں، بھارت سے باہر موجود صارفین کو یہ پوسٹس اب بھی ان کے انسٹاگرام اکاؤنٹ پر نظر آرہی ہیں۔

اس حوالے سے ابھی تک نہ تو وانی کپور اور نہ ہی فلم کی پروڈکشن ٹیم کی جانب سے کوئی باضابطہ بیان جاری کیا گیا ہے، جس کی وجہ سے تجسس مزید بڑھ گیا ہے۔

یاد رہے کہ رومانوی کامیڈی فلم ابیر گلال، جس میں وانی کپور کے ساتھ پاکستانی اداکار فواد خان مرکزی کردار میں ہیں، 9 مئی 2025 کو ریلیز کے لیے شیڈول تھی۔

تاہم، حالیہ پہلگام واقعے کے بعد بھارت میں پاکستانی فنکاروں پر ڈیجیٹل پابندیاں عائد کی جا رہی ہیں، انہی پابندیوں کے تحت اداکار فواد خان کا انسٹاگرام اکاؤنٹ بھی بھارت میں بلاک کر دیا گیا ہے۔

نتیجتاً، وانی کپور کی ان تمام پوسٹس تک بھارت میں رسائی ممکن نہیں رہی، جن میں فواد خان کا ذکر یا ٹیگ موجود تھا، کیونکہ انسٹاگرام نے خودکار طور پر ان پوسٹس کو بھارت میں محدود کر دیا ہے۔