معروف یوٹیوبر ڈکی بھائی اور بالی وڈ کی مقبول ڈانسر نورا فتیحی کے رقص پر عروب جتوئی کا دلچسپ ردِعمل وائرل ہوگیا۔

سوشل میڈیا پر معروف ڈکی بھائی اور نورا فتیحی کی ایک ویڈیو خوب وائرل ہو رہی ہے جس میں دونوں ایک ایونٹ میں رقص کرتے دکھائی دے رہے ہیں۔

اس ویڈیو پر نہ صرف مداحوں کی توجہ مرکوز ہوئی بلکہ ڈکی بھائی کی اہلیہ، عروب جتوئی کا ردِعمل بھی ویڈیو بلاگ میں سامنے آگیا جو خود سوشل میڈیا پر خوب مقبول ہو رہا ہے۔

ڈکی بھائی جن کا اصل نام سعد الرحمان ہے، حال ہی میں دبئی کے سفر پر گئے جہاں وہ ایک پروموشنل ایونٹ کا حصہ بنے۔

اس سفر کو انہوں نے اپنے ویلاگ میں تفصیل سے دکھایا جس میں نورا فتیحی سمیت دیگر فنکاروں کی پرفارمنس بھی شامل تھی۔

ایک لمحے میں نورا فتیض اسٹیج پر رقص کرتے ہوئے دکھائی دیتی ہیں اور وہیں ڈکی بھائی بھی ان کے ساتھ رقص کرنے کی کوشش کرتے ہیں۔

بعدازاں ڈکی بھائی نے اگلے ویلاگ میں اپنی اہلیہ عروب جتوئی کا رقص کے حوالے سے ردِعمل بھی مداحوں سے شیئر کیا۔

عروب جتوئی نے مذاق میں پوچھا ’’تم نورا فتیحی کا ڈانس دیکھنے گئے تھے؟‘‘ جس پر ڈکی بھائی نے مزاحیہ انداز میں جواب دیا ’’نہیں صرف دیکھا نہیں بلکہ ڈانس بھی کیا‘‘۔

عروب جتوئی نے ہنستے ہوئے کہا ’’سعد! کبھی اپنے پیٹ پر بھی نظر ڈال لیا کرو‘‘۔ اس پر دونوں خوب ہنسے۔

جب عروب نے ڈکی سے ایونٹ کی ویڈیوز دکھانے کا کہا تو وہ ٹال مٹول کرتے ہوئے کہنے لگے ’’ابھی ایڈٹنگ باقی ہے، بعد میں دکھاؤں گا‘‘ اور موقع سے نکلنے کی کوشش کرنے لگے۔

ڈکی بھائی اور نورا فتیحی کی ویڈیوز کے ساتھ عروب جتوئی کا ردِعمل مداحوں کو خوب محظوظ کر رہا ہے اور یہ تمام سلسلہ یوٹیوب اور سوشل میڈیا پر کافی وائرل ہوچکا ہے۔