معروف صحافی اور سماجی کارکن ریحام خان نے اداکارہ سارہ خان کے حالیہ اینٹی فیمینزم بیان پر تنقید کرتے ہوئے اسے غیرموزوں قرار دیا ہے۔

انہوں نے اپنے بیان میں کہا کہ سارہ خان شاید یہ بھول رہی ہیں کہ آج خواتین کو میڈیا، فنون لطیفہ اور دیگر شعبوں میں آزادی کے ساتھ کام کرنے کا موقع فیمینزم ہی کی بدولت ملا ہے۔

ریحام خان نے کہا کہ فیمینسٹ خواتین اور مردوں نے برسوں جدوجہد کر کے وہ راستے ہموار کیے ہیں جن کی بدولت آج اداکارائیں کھل کر اپنے کیریئر کا انتخاب کر سکتی ہیں اور اپنی مرضی سے زندگی گزار سکتی ہیں۔

انہوں نے سارہ خان کے بیان پر تبصرہ کرتے ہوئے کہا کہ اگر کوئی فیمینزم سے مکمل اتفاق نہ بھی رکھتا ہو، تب بھی اُسے ایسے حساس موضوعات پر بیان دینے سے گریز کرنا چاہیے کیونکہ یہ تحریک ان خواتین کے حقوق کے لیے ہے جنہیں بنیادی سہولیات اور آزادی میسر نہیں۔

ریحام خان نے مزید کہا کہ بااثر شخصیات کو اُن خواتین کی آواز بننا چاہیے جو معاشرے میں حاشیے پر زندگی گزار رہی ہیں۔

واضح رہے کہ چند روز قبل ایک انٹرویو کے دوران اداکارہ سارہ خان نے فیمینزم سے متعلق اپنے خیالات کا اظہار کرتے ہوئے کہا تھا کہ وہ خود کو زیادہ فیمینسٹ نہیں سمجھتیں اور ان کی رائے میں مردوں کو ان کے کام کرنے دیے جائیں جبکہ خواتین کو گھر کے سکون کو ترجیح دینی چاہیے۔

سارہ خان کے اس بیان نے سوشل میڈیا پر خاصی توجہ حاصل کی، جہاں مداحوں اور ناقدین کی جانب سے مختلف آرا سامنے آئیں، کئی صارفین نے ان کے بیان کو “قدامت پسند سوچ” قرار دیا جبکہ کچھ نے ان کی سادگی اور روایت پسندی کو سراہا۔

یہ بحث اس امر کی عکاس ہے کہ فیمینزم جیسے موضوعات آج بھی پاکستان میں حساس اور متنوع رائے کا باعث بنتے ہیں۔