پاکستان کے معروف اداکار حمزہ علی عباسی نے شوبز سے کنارہ کشی کے حوالے سے سامنے آنے والی خبروں کی وضاحت کرتے ہوئے کہا کہ میں نے انڈسٹری کو مکمل طور پر خیرباد نہیں کہا بلکہ صرف عارضی وقفہ لیا تھا۔

ایک حالیہ پوڈکاسٹ میں گفتگو کرتے ہوئے حمزہ علی عباسی نے واضح کیا کہ 2019 میں میری ایک ویڈیو کو سیاق و سباق سے ہٹ کر پیش کیا گیا، جس کی وجہ سے میڈیا میں میرے شوبز چھوڑنے کی خبریں گردش کرنے لگیں۔

حمزہ علی عباسی نے کہا کہ میں نے اُس ویڈیو میں واضح طور پر کہا تھا کہ میں صرف بریک لے رہا ہوں لیکن اگلے دن ہی یہ خبریں آنے لگیں کہ میں نے شوبز چھوڑ دیا ہے۔

اداکار نے کہا کہ میں اسلامی تعلیمات کے طالب علم ہوں اور معروف اسکالر جاوید احمد غامدی کے نظریات سے متاثر ہوں، اسی مقصد کے تحت امریکا بھی گیا تاکہ دین کی بہتر سمجھ حاصل کر سکوں۔

انہوں نے افسوس کا اظہار کیا کہ اکثر لوگ مکمل ویڈیوز دیکھنے کے بجائے صرف کلپس کی بنیاد پر رائے قائم کرتے ہیں، جس سے بات کا اصل مطلب بدل جاتا ہے۔

واضح رہے کہ 2019 میں سوشل میڈیا پر یہ خبریں گردش کرنے لگی تھیں کہ حمزہ علی عباسی نے اداکاری کو خیرباد کہہ دیا ہے، تاہم بعد ازاں یہ مختلف ٹی وی پراجیکٹس اور فلمی سرگرمیوں میں دوبارہ دکھائی دیے، جس سے یہ واضح ہوا کہ ان کا وقفہ وقتی تھا۔