پاکستان کے سپر اسٹار فواد خان اور خوبرو اداکارہ ہانیہ عامر کی اسکرین پر مشترکہ انٹری نے سوشل میڈیا پر دھوم مچا دی ہے۔

یہ دونوں ستارے کسی ڈرامے یا فلم میں نہیں بلکہ سولر انرجی کے اشتہار میں ایک ساتھ جلوہ گر ہوئے ہیں، جس میں ان کی جوڑی کو مداحوں کی جانب سے بے حد پسند کیا جا رہا ہے۔

فواد اور ہانیہ، جو ماضی میں مختلف راہوں پر گامزن رہے، اب ایک ساتھ اسکرین شیئر کرتے نظر آئے، جس نے دونوں کے فین بیس کو ایک ساتھ لا کر کھڑا کر دیا۔

اشتہار میں ان کی باہمی کیمسٹری نے دیکھنے والوں کو اتنا متاثر کیا کہ مداحوں نے فوری طور پر انہیں کسی بڑے ڈرامے یا فلم میں اکٹھے دیکھنے کی خواہش کا اظہار کر دیا۔

مزید پڑھیں:  نادیہ خان نے فواد خان اور ہانیہ عامر کو تنقید کا نشانہ بنا ڈالا

یہ پہلا موقع نہیں ہے جب یہ دونوں فنکار ایک ساتھ نظر آئے ہوں، 2019 میں پیپسی کے ایک کمرشل میں بھی فواد خان اور ہانیہ عامر نے اسکرین شیئر کیا تھا، تاہم اس وقت ہانیہ کی شہرت محدود تھی، آج کی ہانیہ عامر نہ صرف صفِ اول کی اداکارہ بن چکی ہیں بلکہ فواد خان کے برابر مقبولیت کی حامل بھی ہیں، جس نے ان کی جوڑی کو مزید مضبوط اور پُرکشش بنا دیا ہے۔

مداحوں کو اب ان دونوں کو ایک بڑی اسکرین یا کامیاب ڈرامائی سیریل میں ایک ساتھ دیکھنے کا بےچینی سے انتظار ہے۔