پاکستان شوبز کی سینئر اداکارہ حنا خواجہ بیات نے نوجوانوں میں بڑھتے ہوئے ویپنگ اور تمباکو نوشی کے رجحان پر شدید تشویش کا اظہار کرتے ہوئے کہاکہ یہ عادت صحت کے لیے نہایت نقصان دہ ہے اور رفتہ رفتہ نوجوانوں کو سگریٹ نوشی کی جانب مائل کر رہی ہے۔

حنا بیات نے اپنے ایک حالیہ انٹرویو میں شوبز انڈسٹری سے جڑے چند اہم اور حساس موضوعات پر سنجیدہ گفتگو کی، جس میں خاص طور پر نوجوان فنکاروں کے رویّوں، صحت سے متعلق لاپرواہی اور تمباکو نوشی جیسے خطرناک رجحانات کو اجاگر کیا۔

اداکارہ کا کہنا تھا کہ میں وزارتِ تمباکو نوشی نوجوان اداکاروں کے نام کرنا چاہوں گی کیونکہ آئے روز سیٹ پر نوجوانوں کو ویپ یا سگریٹ پیتے دیکھا جاتا ہے، جو نہ صرف ان کی اپنی صحت بلکہ دیگر افراد کے لیے بھی خطرناک ہے۔

انہوں نے ایسے رویوں کو غیر ذمہ دارانہ قرار دیتے ہوئے کہا کہ جب کسی نوجوان کو اس حوالے سے سمجھایا جائے تو وہ ناراضی کا اظہار کرتے ہیں، حالانکہ فنکاروں کو یہ بات سمجھنی چاہیے کہ وہ عوامی شخصیات ہوتے ہیں اور ان کے طرزِعمل کا معاشرے پر گہرا اثر پڑتا ہے۔

ویپنگ کے فیشن بننے پر تنقید کرتے ہوئے حنا بیات نے کہا کہ نوجوان اسے ایک کم نقصان دہ متبادل یا اسٹائل سمبل سمجھ کر اپنا رہے ہیں، مگر درحقیقت یہ عادت آگے چل کر سگریٹ نوشی جیسے خطرناک مرحلے تک پہنچا دیتی ہے۔

انہوں نے نوجوان فنکاروں کو مشورہ دیا کہ وہ اپنی شہرت اور اثر و رسوخ کو مثبت پیغام رسانی کے لیے استعمال کریں، تاکہ وہ خود بھی ایک صحت مند زندگی گزار سکیں اور اپنے مداحوں کے لیے مثبت مثال قائم کریں۔

اس موقع پر اداکارہ نے والدین اور اساتذہ پر بھی زور دیا کہ وہ نئی نسل کی تربیت میں فعال کردار ادا کریں اور نوجوانوں کو صحت مند طرزِ زندگی اپنانے کی ترغیب دیں۔

حنا بیات نے مزید کہا کہ فنکار معاشرے کا آئینہ ہوتے ہیں، ان کے قول و فعل نئی نسل پر اثر انداز ہوتے ہیں اور یہی شعور ایک ذمہ دار فنکار کی پہچان ہوتا ہے۔