ادب اور تھیٹر کی دنیا کے عظیم نام ٹام اسٹاپارڈ 88 برس کی عمر میں اپنے گھر پر اہلِ خانہ کی موجودگی میں انتقال کر گئے۔
اہلِ خانہ کے مطابق ٹام اسٹاپارڈ کا انتقال پُرامن ماحول میں ہوا۔ وہ اپنی فکری گہرائی، منفرد تخلیقی انداز اور شاندار تحریری مہارت کے باعث دنیا بھر میں بطور ڈرامہ نگار اور اسکرین رائٹر شہرت رکھتے تھے۔
ٹام اسٹاپارڈ کی سب سے مقبول تخلیق 1998 کی فلم ’شیکسپیئر اِن لو‘ تھی، جس پر انہیں آسکر اور گولڈن گلوب سمیت عالمی سطح کے کئی معتبر ایوارڈز سے نوازا گیا۔
ان کا تھیٹر کی دنیا میں سفر 1960 کی دہائی میں شروع ہوا، جس کے دوران انہوں نے لیو پول، دی رئیل تھنگ، آرکیڈیا‘ اور روزن کرانٹز جیسے شہرۂ آفاق ڈرامے تحریر کیے۔ ان کے کام کو فلسفے، سیاست، ادب اور انسانی جذبات کے خوبصورت امتزاج کے طور پر جانا جاتا تھا۔
ٹام اسٹاپارڈ کے انتقال نے عالمی تھیٹر برادری اور ادب کے شائقین کو گہرے دکھ میں مبتلا کر دیا ہے، ان کی باریک بینی سے لکھے گئے مکالمے، انسانی احساسات کی سچی عکاسی اور تخیل سے بھرپور تخلیقات انہیں ہمیشہ امر رکھیں گی۔
برطانوی حکومت نے ان کی خدمات کے اعتراف میں انہیں ’سر‘ کا خطاب بھی عطا کیا تھا۔
مزید پڑھیں: معروف ڈرامہ نگار افتخار احمد افی کی کتاب “چکر چھولے” کی رونمائی
