مُلک بھر میں کورونا وائرس کے کیسز سے متاثرہ ہیلتھ کئیر ورکرز کی تعداد میں مزید اضافہ ہوگیا ہے لیکن حکومت کی جانب سے کئے جانے والے انتظامات تاحال ناکمل ہیں۔
تفصیلات کے مطابق مُلک بھر میں کورونا وائرس کیسز سے متاثرہ ہیلتھ کئیر ورکرز کی تعداد میں مزید اضافہ ہوتا جارہا ہے لیکن پھر بھی حکومتی انتظامات نامکمل نظر آرہے ہیں۔
وزارت نیشنل ہیلتھ اینڈ ایمرجنسی سروس کی جانب سے کورونا وائرس کے ہیلتھ کئیر ورکرز پر جان لیوا حملے رپورٹ جاری کر دی گئی ہے۔
گزشتہ چوبیس گھنٹوں میں کووڈ19 کے شکار ہیلتھ کئیر ورکرز 117 نئے کیسز رپورٹ ہوئے ہیں جس کے بعد کورونا وائرس سے متاثرہ ڈاکٹر اور پیرامیڈیکل اسٹاف کی تعداد 2561 تک پہنچ گئی ہے۔
رپورٹ کے مطابق ڈاکٹرز سمیت طبی عملے کے کورونا وائرس سے مرنے والے افراد کی تعداد 25 ہوگئی جبکہ مزید 78 ڈاکٹرز متاثر، کل تعداد 1510 تک جا پہنچی ہے۔
کورونا وائرس سے متاثرہ نرسز کی تعداد بھی 352 تک پہنچ گئی جبکہ طبی عملے کے مجموعی طور پر 699 افراد کورونا وائرس سے متاثر ہو چکے ہیں اور میڈیکل سے وابستہ 231 افراد مختلف ہسپتالوں میں زیر علاج ہیں۔
رپورٹ میں بتایا گیا ہے کہ 8 ہیلتھ کئیر ورکرز تشویشناک حالت ہونے کے باعث وینٹی لیٹرز پر ہیں جبکہ 1368 افراد گھروں اور دیگر مقامات پر قرنطینہ کئے گئے ہیں اور ملک بھر میں 937 صحت یاب ہو کر گھر پہنچ گئے ہیں۔
یاد رہے کہ ملک میں آج اب تک کورونا سے اموات کی مجموعی تعداد 1688 ہوگئی جب کہ نئے کیسز سامنے آنے کے بعد مریضوں کی تعداد 80463 تک پہنچ گئی ہے۔
اب تک سندھ میں 526 اور پنجاب میں کورونا سے 570 افراد انتقال کرچکے ہیں جب کہ خیبر پختونخوا میں 490 افراد جاں بحق ہو چکے ہیں۔
اس کے علاوہ بلوچستان میں 49، اسلام آباد 34 ، گلگت بلتستان میں 12 اور آزاد کشمیر میں مہلک وائرس سے 7 افراد جاں بحق ہو چکے ہیں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News