غذائی ماہرین کے مطابق رمضان کے پورے مہینے فروٹ چاٹ کا باقاعدگی سے استعمال کرنا صحت کےلئے بےحد مفید ہے۔

فروٹ چاٹ دل کو طاقت اور معدے کو فرحت بخشتی ہے۔

فروٹ چاٹ کھانے کے نتیجے میں جہاں خوبصورتی میں اضافہ ہوتا ہے وہیں مجموعی صحت پر بھی بہترین نتائج حاصل ہوتے ہیں۔

فروٹ چاٹ کھانے کے فوائد تو بےشمار ہیں مگر اس بات کا دھیان رکھنا بھی بے حد ضروری ہے کہ اسے بناتے وقت کوئی غلطی تو نہیں کی جارہی ہے ؟

کیونکہ کچھ پھلوں کا ایک ساتھ استعمال صحت کے لیے نقصان دہ ثابت ہو سکتا ہے۔

تربوز

غذائی ماہرین کی جانب سے تربوز کو فروٹ چاٹ میں شامل کرنے سے منع کیا جاتا ہے، اس میں وافر مقدار میں پانی شامل ہوتا ہے۔

تربوز اور پانی کے ایک ساتھ استعمال سے ہیضہ ہونے کا خدشہ بڑھ جاتا ہے۔

روزے دار جیسے ہی روزہ افطار کرتا ہے تو وہ سب سے پہلے کھجور کے ساتھ ایک گلاس پانی پیتا ہے، اس کے بعد جب یہ فروٹ چاٹ کھائی جاتی ہے تو اس میں موجود تربوز ہیضہ ہونے کا سبب بن سکتا ہے۔

تربوز کو فروٹ چاٹ میں شامل کرنے کے بجائے افطاری کے بعد بھوک محسوس ہونے پر کھائیں۔

کیلے

ماہرین کی جانب سے تجویز کیا جاتا ہے کہ اگر دسترخوان پر لسی یا دودھ سے بنی کوئی اور غذا بھی موجود ہے تو اس دن کیلے کا استعمال فروٹ چاٹ میں نہ کریں، ایسا کرنے سے پیٹ خراب اور طبیعت گھنٹوں بوجھل ہو سکتی ہے۔

لیموں 

کچھ لوگوں کو فروٹ چاٹ میں کھٹائی اچھی لگتی ہے، کوشش کریں فروٹ چاٹ بناتے ہوئے اس بات کا خیال رہے کہ اس میں لیموں شامل نہ کریں۔

غذائی ماہرین کے مطابق فروٹ چاٹ کا ذائقہ بڑھانے کے لیے کریم کا استعمال کیا جا سکتا ہے مگر فروٹ چاٹ میں اس دوران لیموں کا رس شامل نہ کریں۔