انڈا صحت سے پوراورایک مکمل غذا ہے اس میں ایسے اجزاء موجود ہوتے ہیں جو آپ کو صحت مند رکھنے کے ساتھ فوری توانائی بھی فراہم کرتے ہیں۔

انڈا منفرد ذائقہ رکھنے کی وجہ سے میٹھے اور نمکین دونوں کے طرح کے پکوانوں میں استعمال کیاجاتا ہے۔ جبکہ دنیا بھر میں لوگوں کی بڑی تعداد اسے دن کی پہلی غذا یعنی ناشتے کے طور پر استعمال کرتی ہے۔

انڈا دو حصوں زردی اورسفیدی پر مشتمل ہوتا ہے یہ دونوں ہی غذائیت سے بھرپورہوتی ہیں تاہم ماہرین سفیدی کو انتہائی صحت بخش قرار دیتے ہیں۔

انڈے کے حوالے سے اکثر یہ بات کہی جاتی ہے کہ اس میں موجود زردی جسم میں کولیسٹرول ی سطح کو بڑھانے میں اہم کردار ادا کرتی ہے یہی وجہ لوگوں کی اکثریت صرف سفیدی کو غذا میں شامل رکھنے کو ترجیح دیتی ہے۔

مکمل انڈے کے بجائے صرف سفیدی کو غذا میں شامل رکھنے سے آپ اس کی کیلوریز کی مقدار کو کم کرسکتے ہیں کیونکہ تمام تر چکنائیاں زردی میں موجود ہوتی ہیں، یہی وجہ ہے کہ یہاں پر انڈے کی سفیدی کے چند حیران کن فوائد پیش کیے جارہے ہیں۔

کولیسٹرول سے پاک

اگر انڈے سے زردی کو نکال دیا جائے تو جو سفیدی بچ جاتی ہے اس میں کوئی کولیسٹرول نہیں ہوتا ہے۔ لہذا ایسے افراد جو ہائی کولیسٹرول میں مبتلا ہیں وہ سفیدی کو غذا میں شامل رکھ کر دل کو صحت مند رکھ سکتے ہیں۔

پروٹین سے بھرپور

انڈے کی سفیدی میں بہترین معیار کا پروٹین کثرت سے پایا جاتا ہے جو آپ کے جسم کے لیے بے حد ضروری ہے۔ یہ پٹھوں کو مضبوط بنانے کے ساتھ کھانے کی طلب روکنے میں مددفراہم کرتا ہے۔

ضروری وٹامنز سے بھرپو

انڈے کی سفیدی میں رائبوفلیوین اور وٹامن بی ٹو موجود ہوتا ہے جو پٹھوں کی تنزلی اور مائیگرین سے بچانے میں مدد دیتا ہے۔

کم کیلوری والی غذا

اگر آپ وزن کم کرنا چاہتے ہیں تو اپنی غذا میں مکمل انڈے کے بجائے صرف سفیدی کو غذا کا حصہ بنائیں اس طرح زردی کی کیلوریز کی بچے رہیں گے۔

بلڈ پریشر کو توازن میں رکھے

امریکن کیمیکل سوسائٹی کے تحت کی جانے والی تحقیق کے مطابق انڈے کی سفیدی میں ایک ایسا پروٹین پایا جاتا ہے جو بلڈ پریشر کوتوازن میں رکھتا ہے۔

امراض قلب کے خطرے کو کم کرے

انڈے کی سفیدی میں موجود پوٹاشیم امراض قلب سے تحفظ فراہم کرتا ہے ساتھ ہی یہ شریانوں میں خون کی روانی کو بھی بہتر بناتا ہے ۔