ماہرین نے ایسی غذاؤں کے بارے میں بتادیا ہے جن کے استعمال سے آپ ہارٹ اٹیک اور فالج جیسے امراض سے بچ سکتے ہیں۔

 حال ہی میں کی گئی ایک تحقیق سے یہ بات سامنے آئی ہے کہ 6 غذاؤں کا ناکافی استعمال دل کی شریانوں سے جڑے امراض کا خطرہ نمایاں حد تک بڑھا دیتا ہے۔

تحقیق کے دوران درجنوں ممالک میں لوگوں کی غذاؤں سے صحت پر مرتب اثرات کا جائزہ لیا گیا اور ان نتائج کا موازنہ ماضی کی 5 تحقیقی رپورٹس سے کیا گیا۔

تحقیق میں دریافت کیا گیا کہ پھلوں، سبزیوں، پھلیوں و دالوں، گریوں، مچھلی اور چکنائی والی دودھ کی مصنوعات کا استعمال دل کی شریانوں سے جڑے امراض بشمول ہارٹ اٹیک اور فالج کا خطرہ کم کرنے کے لیے بنیادی حیثیت رکھتا ہے۔

تحقیق کے مطابق روزانہ کچھ مقدار میں پھل، سبزیاں، گریاں، دودھ یا اس سے بنی مصنوعات کا استعمال کرنا چاہیے جبکہ ہفتے میں 3 سے 4 بار پھلیوں جبکہ 2 سے 3 بار مچھلی کھانے سے دل کی صحت کو فائدہ ہوتا ہے۔

دن میں ایک بار کچھ مقدار میں سرخ گوشت یا مرغی کا استعمال بھی صحت کے لیے مفید ثابت ہو سکتا ہے، مگر اس کے لیے ضروری ہے کہ باقی غذا صحت کے لیے مفید ہو۔

ماہرین نے بتایا کہ متعدد تحقیقی رپورٹس سے ثابت ہوا ہے کہ پھلوں کو کھانے سے ہارٹ اٹیک اور فالج کا خطرہ نمایاں حد تک کم ہوتا ہے جبکہ ذیابیطس ٹائپ 2، کینسر اور ہائی بلڈ پریشر سے بچنے میں بھی مدد ملتی ہے۔

ان کا کہنا تھا کہ اسی طرح سبزیاں کھانے سے بھی دل کی شریانوں کے امراض سے بچنے میں مدد ملتی ہے جبکہ پھلیوں اور دالوں کا استعمال بھی امراض قلب، بلڈ کولیسٹرول اور ہائی بلڈ پریشر کا خطرہ کم کرتا ہے۔

ماہرین کا کہنا ہے کہ گریوں کے استعمال سے نقصان بلڈ کولیسٹرول کی سطح کم ہوتی ہے جس سے امراض قلب کا خطرہ کم ہوتا ہے۔