اسی کی دہائی میں نائٹ رائیڈر نامی ایک امریکی ٹی وی سیریز کافی مقبول تھی جس میں ہیرو کے پاس کار ہوتی ہے جو انسانوں کی طرح باتیں کرنے کے ساتھ اسے مشورے بھی دیتی ہے تاہم تینتالیس برس بعد جنرل موٹرز نے یہ خواب سچ کر دکھایا۔
جنرل موٹرز نے شنگھائی میں ایک ایسی کار متعارف کرائی ہے جس میں ذہین ہولوگرافک اسسٹنٹ موجود ہے جو دوران ڈرائیونگ کار سوار کو مفید معلومات اور تفریح فراہم کرتا ہے۔
بیوک الیکٹرا اوربٹ نامی اس گاڑی میں کرسٹل بال سے مشابہت رکھنے والا ہولوگرافک اسسٹنٹ مصنوعی ذہانت کا استعمال کرتے ہوئے ایک معاون کے طور پر کام کرتا ہے، یہ ہولوگرام ڈرائیور سے دوران ڈرائیونگ بات چیت کر سکتا ہے اور ایسا محسوس ہوتا ہے جیسے کار خود زندہ ہو۔
یہ بھی پڑھیں: شنگھائی میں ورلڈ اے آئی کانفرنس کا آغاز؛ انسان نما روبوٹس کی حیران کن نمائش
ڈیش بورڈ پرنصب یہ ہولوگرافک اسسٹنٹ گاڑی کا دماغ ہے اور مصنوعی ذہانت سے چلنے والا یہ سسٹم کئی افعال سرانجام دیتا ہے مثلاً گاڑی کے درجہ حرارت اور آب و ہوا کو ایڈجسٹ کرنا، موسیقی، لائٹنگ وغیرہ کو کنٹرول کرنا، بغیر کسی بٹن کو چھوئے آواز یا ہاتھ کے اشاروں کو سمجھنا اور اس پر عمل کرنا شامل ہے، اس کے علاوہ یہ وقت کے ساتھ آپ کی ڈرائیونگ کی طریقہ، عادات اور پسندیدہ چیزوں کو سیکھ کر اپنائیت کا احساس دلاتا ہے۔
یہ ہولوگرام نہ صرف مسلسل حرکت کرتا ہے بلکہ آپ کی باتوں کا جواب بھی دیتا ہے ایسا لگتا ہے جیسے خود زندہ ہو۔ اسی لیے اسے لیونگ ہولوگرام کہا جاتا ہے، یہی خصوصیت بیوک الیکٹرا اوربٹ کو جنرل موٹرز کی دیگر گاڑیوں سے منفرد بناتی ہے۔
