وفاقی دارالحکومت اسلام آباد میں سعودی سفارتخانے میں شاہی مہمانوں کے اعزاز میں تقریب کا انعقاد کیا گیا۔

تفصیلات  کے مطابق سعودی سفیر نواف المالکی کی صدارت میں ہونے والی تقریب میں وفاقی وزیر مذہبی امور پیر نور الحق قادری بطور مہمان خصوصی شریک ہوئے۔

پیر نور الحق قادری نے اس موقع پر تقریب سے خطاب میں کہا کہ سعودی عرب ہمارا برادر اسلامی ملک ہے۔ سعودی عرب نے پاکستان کی مہمان نوازی میں کبھی کوئی کمی نہیں رکھی۔

انہوں نے کہا کہ پاکستان کے عوام کے دل سعودی عرب کے ساتھ دھڑکتے ہیں۔ خادم حرمین شریفین شاہ سلمان نے ہر مشکل وقت میں پاکستان کا ساتھ دیا۔ کسی بھی قدرتی آفت کے موقع پر بھی سعودی عرب نے پاکستان کیساتھ بھائیوں جیسا سلوک کیا۔

سعودی سفیر نواف المالکی نے خطاب میں کہا کہ پاکستانی حجاج کی خدمت ہمارا فرض ہے۔ پاکستانی عوام ہمارے بہن بھائی ہیں ۔ہر سال کی طرح رواں برس بھی حج کے بہترین انتظامات کئے گئے ہیں۔ شاہ سلمان اور ولی عہد محمد بن سلمان حج انتطامات کی خود نگرانی کررہے ہیں۔روڈ ٹو مکہ منصوبہ پاکستانی حجاج کے لئے ایک تحفہ ہے۔

ان کا مزید کہنا تھا کہ سعودی سفارتخانہ پاکستانیوں عازمین کو آن لائن اور بروقت ویزوں کا اجراء بھی یقینی بنا رہا ہے۔