وزیر اعظم کے معاون خصوصی برائے احتساب شہزاد اکبر نےسابق وزیر اعلیٰ پنجاب شہباز شریف کے خلاف برطانوی عدالت سے رجوع کرنے کا اعلان کردیا۔

تفصیلات کے مطابق وزیر اعظم کے معاون خصوصی برائے احتساب شہزاد اکبر نے اسلام آباد میں پریس کانفرنس کی۔

اس دوران انہوں ں نے کہا کہ  برطانوی  اخبار ڈیلی میل کی خبر پر شہباز شریف عدالت نہیں گئے صرف اخبار سے شکایت کی ہے۔

شہزاد اکبر کا کہنا تھا کہ خبر دینے والا صحافی آج بھی اپنے دعوی پر قائم ہے۔

سٹوری کے بعد شہاز شریف کی جانب سے  قوم سے وعدہ کیا گیا تھا  کہ  وزیر اعظم اور میرے خلاف قانونی کاروائی کی جائے گی۔

شہباز شریف کی 4 صفحات پر مشتمل شکایت میں خبر کی تردید نہیں کی گئی، میں نے واضح کیا تھا کہ کس طرح پیسہ ٹرانسفر کیا گیا۔

معاون خصوصی احتساب کا کہنا تھا کہ 10سالوں کی تحقیقات کے لیے کمیشن بن چکاہے، کرپشن تحقیقات کی بات کریں تو کہتے ہیں سی پیک خطرے میں ہے، شہباز شریف نے بڑے چور اپنے داماد علی عمران کو باہر بھگا دیا، منی لانڈرنگ کی بات کرو تو کہتے ہیں برطانیہ سے تعلقات خطرے میں ہیں تاہم ہمارے تعلقات اور فنڈنگ اس سے متاثر نہیں ہوتی۔

شہزاد اکبر نے کہا کہ وزیراعظم عمران خان نے عرفان صدیقی کے معاملے اور انہیں ہتھکڑیاں لگانے کا نوٹس لیا ہے، اس معاملے پر تحقیقات ہونی چاہیے، چھٹی کے روز عرفان صدیقی کی ضمانت بھی غیر معمولی بات ہے تاہم عرفان صدیقی کی ضمانت ہوئی یہ اچھی بات ہے۔