معاون خصوصی وزیراعظم برائے اطلاعات فردوس عاشق اعوان نےکہا ہے کہ بھارت کے جارحانہ عزائم خطے کے امن کیلئے خطرہ ہیں۔

فردوس عاشق اعوان نے سماجی رابطے کی ویب سایٹ ٹویٹرپر بیان دیتے ہوئےقوم کے بہادر سپوت کوخراج تحسین پیش کرتےہوئے کہاکہ وطن عزیز کے دفاع کی خاطر قربان ہونے والے شہدا ہمارا فخر ہیں، قوم شہدا کو خراج عقیدت پیش کرتی ہے۔

معاون خصوصی برائے اطلاعات نےلائن آف کنٹرول پر بھارتی فوج کی بلااشتعال فائرنگ کی شدید مذمت بھی کی۔ انہوں نےکہا کہ بھارت ایل او سی کے دونوں اطراف کشمیریوں کو  ظلم اور بربریت کا نشانہ بنا رہا ہے۔ بھارت کے جارحانہ عزائم خطے کے امن کیلئے خطرہ ہیں، ایل او سی پر بھارتی فوج کی بلااشتعال فائرنگ کی شدید مذمت کرتے ہیں۔

گزشتہ روزمعاون خصوصی نے مودی کوہٹلر سے تشبیہہ دیتے  ہوئےکہا کہ ہٹلر نے ایک نسل کو جس طرح اپنے ظلم اور بربریت کی بھینٹ چڑھایا،خاکم بدہن مودی اسی طرح کشمیریوں کی نسل کشی کرنا چاہتا ہے۔مودی اپنے سیاہ اقدام سے ان عزائم کی تکمیل چاہتا ہے جس کا آغاز اس نے گجرات میں مسلمانوں کے قتل عام سے کیا۔

معان خصوصی کاکہناتھاکہ عمران خان کی قیادت میں پاکستان ہرفورم پر مظلوم کشمیریوں کی وکالت کرے گا تاکہ بھارت کو مجبور کیاجاسکے کہ تنازعہ کشمیر کو اقوام متحدہ کی قراردادوں اور کشمیری عوام کی امنگوں کے مطابق حل کا جاسکے۔

تنازعہ کشمیر پرسلامتی کونسل کااجلاس بھارت کے اس دعوے پر کاری ضرب ہے کہ کشمیر ان کا اندرونی معاملہ ہے۔

انہوں نے کہا کہ پانچ دہائیوں بعد سلامتی کونسل کا تنازعہ کشمیر پر اجلاس بلانا ہماری سفارتی فتح ہے اور اس سلسلے میں روس نے بھی پاکستان کے مطالبے کی تائید کی ہے۔ مہذب دنیا مودی کے غیر قانونی اور یکطرفہ اقدام کانوٹس لے رہی ہے۔