وزیرخارجہ مخدوم شاہ محمود قریشی نے ایران میں گورنرجنرل خوراسان رضوی (مشہد)جناب علی رضا رزم حسینی سے ملاقات کی ہے۔

اس موقع پر گورنر جنرل مشہد نے وزیر خارجہ مخدوم شاہ محمود قریشی اور ان کے وفد کو مشہد تشریف آوری پر خوش آمدید کہا۔

گورنرجنرل خوراسان نے کہا کہ پاکستان ںسمیت دنیا بھر سے  زیارات کیلئے تشریف لانے والے سالانہ  تیس لاکھ زائرین کو ہر ممکن سہولیات فراہم کرنے کی کوشش کی جاتی ہیں ۔

وزیر خارجہ مخدوم شاہ محمود قریشی نے پر تپاک استقبال پر گورنر مشہد کا شکریہ ادا کیا۔

وزیرخارجہ نے کہا کہ اپنے حالیہ دورے کا آغاز اس مقدس مقام کی زیارت سے کرنا ،باعث سعادت سمجھتا ہوں۔

شاہ محمود قریشی نے  یہ بھی کہا کہ پاکستان سے زائرین کی ایک بڑی تعداد ہرسال  روضہء امام رضا علیہ السلام کی زیارت کے لئے یہاں آتی ہے اور پاکستانی زائرین کے لئے بہترین انتظامات کرنے پرگورنر مشہد کا شکرگزار ہوں۔

وزیر خارجہ مخدوم شاہ محمود قریشی ایران پہنچ گئے

یاد رہے اس سے قبل وزیر خارجہ شاہ محمود قریشی ایران کے شہر مشہد کے ہوائی اڈے پر پہنچے تو ڈپٹی گورنر جنرل صوبہ خراسان رضاوی محمد صادق, پاکستان کے قونصل جنرل عرفان محمود بخاری اور قونصل خانے کے حکام نے وزیر خارجہ کا پرتپاک خیر مقدم کیا۔

اس موقع پر وزیر خارجہ مخدوم شاہ محمود قریشی نے مشہد میں روضہء امام رضا علیہ السلام پر حاضری دی اور احاطہ ء روضہ ء امام رضا علیہ السلام میں نوافل ادا کئے جبکہ پاکستان کی سلامتی اور مسلم امہ کے اتحاد و یگانگت کیلئے خصوصی دعائیں بھی  کیں تھی۔

واضح رہے کہ وزیراعظم عمران خان نے چند روز قبل سماجی رابطے کی ویب سائٹ ٹویٹر پر ٹویٹ کرتے ہوئے کہا تھا کہ میں نے وزیر خارجہ شاہ محمود قریشی کو ہدایت کی ہے کہ وہ ایران، سعودی عرب اور امریکا کا دورہ کریں۔

اس ہدایت کے بعد وزیرخارجہ شاہ محمود قریشی نے مختلف ممالک کے وزرائے خارجہ سے رابطے کیے اور مشرق وسطی میں کشیدگی کے بعد سفارتی محاذ پر اپنا کردار ادا کرنے کی تیاریاں شروع کر دی ہیں۔