انسانی جسم کی چربی پگھلانے اورموٹاپا کم کرنے کیلئے ماہرین صحت کی جانب سے انوکھا نسخہ تیار کرلیا گیا۔ جس میں نمکین پانی میں برفیلے ذرات شامل کرکے انہیں انجکشن کے ذریعے جسم میں داخل کرکے فالتو چربی پگھلائی جاسکتی ہے۔

ہارورڈ یونیورسٹی کےماہرین کی جانب سے تیارکردہ نسخے میں نمکین پانی میں برفیلے ذرات شامل کرکے انہیں انجکشن کے ذریعے جسم میں داخل کیا جاسکتا ہے۔

تجربے کیلئےہارورڈ یونیورسٹی اورمیسا چیوسیٹس جنرل ہسپتال (ایم جی ایچ) کے سائنسدانوں نے نمکین پانی میں گلیسرول شامل کیا اور پھر 20 سے 40 فیصد مقدار میں برف کے باریک ٹکڑے شامل کیے۔ اگلے مرحلے میں اسے براہِ راست جسم میں چربی کے ذخائرمثلاً پیٹ میں داخل کردیا گیا۔

انجکشن کے جسم میں داخل ہونے سےبرفیلے ذرات چربی میں گھس کر ان کے خلیات کو تباہ کرنے میں کامیاب ہوگئے اور چکنائی کے خلیات جسم میں پگھل گئے۔ چند ہفتوں بعد چکنائی والے مردہ خلیات جسم سے باہر نکل کر خارج ہوسکتے ہیں۔

ماہرین کی ٹیم کے مطابق یہ جسم کے کسی بھی حصے میں چربی کے لوتھڑے پگھلاسکتے ہیں خواہ وہ کتنی ہی گہرائی میں ہی کیوں نہ ہوں بس شرط یہ ہے کہ وہاں سوئی اور تارپہنچ سکے اور ٹھوس پٹھوں پر کوئی منفی اثر نہیں پڑتا۔

ماہرین کی جانب سےتجربے میں کامیابی کےبعدبرفیلےمحلول کو موٹے تازے خنزیروں پرآزمایا گیا توآٹھ ہفتوں میں ان کی چربی 55 فیصد تک کم ہوگئی۔ پھرغور کیا گیا تو جلد اوراندرونی گوشت متاثر نہیں ہوا تھا۔

اس دلچسپ عمل کو ’کرائیو لائپو لائسس‘ اور ’کول اسکلپٹنگ ‘ کا نام دیا گیا ہے۔ تحقیق سے وابستہ پروفیسر للیت گریبیان نے کہا ہے صرف ایک سادہ انجکشن سے کوئی بھی ڈاکٹر ایک منٹ میں یہ کام کرسکتا ہے۔ مریض گھرجاسکتا ہے اور اس کے بعد دھیرے دھیرے چربی گھلتی رہتی ہے۔

کچھ ناقدین نے تجربے سے اختلاف رائے رکھتے ہوئے کہاکہ اسے صرف خنزیروں پر آزمایا گیا ہے اور انسانوں پر اس کے نتائج مختلف ہوسکتے ہیں۔

ناقدین کا کہناہے کہ ان کے مطابق یہ کاسمیٹک کی حد تک تو ٹھیک ہے لیکن صرف نمکین ٹیکوں سے موٹاپا دور نہیں کیا جاسکتا، اس ضمن میں اس تحقیق پر مزید تجربات کی ضرورت ہے۔