سینئرپاکستانی اداکارہ و فلمساز سنگیتا نےپاکستانی اداکاراوں کوتنقیدکا نشانہ بناتے ہوئےکہا ہے کہ اداکارائیں اپنی ثقافت چھوڑ کر مغربی طرزفیشن کو اپنا رہی ہیں۔

پاکستان شوبز انڈسٹری کی نامور اور سینئر اداکارہ و فلمساز سنگیتا نے اپنے ایک انٹرویوکے دوران  پاکستانی اداکاراوں کے لباس پر تنقید کرتے ہوئے کہا کہ ہماری اداکارائیں اپنی ثقافت چھوڑ کر ہالی ووڈ کی ثقافت اپنا رہی ہیں۔

سنگیتا سےانٹرویو کے دوران  سوال کیا گیا کہ ’کیا ایک اچھی اداکارہ بننے کے لیے نامناسب لباس پہننا ضروری ہے؟‘جس پرسنگیتا کاکہناتھا کہ ’نہیں ایک اچھی اداکارہ بننے کے لیے سب سے ضروری اداکاری ہے، آپ کو صرف اپنے اداکاری پر توجہ دینی چاہیے ۔‘

انہوں نے کہا کہ ’ہمارے دور میں جب ہم فلموں میں کام کرتے تھے تو ہمارے لیے ایک خاتون ہوتی تھی جو کردار کے حساب سے ہمارے لباس ڈیزائن کرتی تھی لیکن اب ایسا نہیں ہوتا ہے، آج کے دور میں کردار کے حساب سے کپڑے نہیں ہوتے۔‘

اُنہوں نے کہا کہ ’میں جب ایوارڈ شو میں نوجوان اداکاراؤں کو دیکھتی ہوں تو مجھے بہت عجیب محسوس ہوتا ہے۔‘

اُنہوں نے کہا کہ ’آج کی اداکاراؤں کو دیکھ کر میں سوچتی ہوں کہ آپ ہالی ووڈ کو کیوں کاپی کر رہی ہیں، آپ اپنا کلچر، پاکستانی طرزِ لباس اپنائیں۔‘

سنگیتا کاکہناتھاکہ’اگر آپ چوڑی دار پجامہ، شلوار قمیض، لمبی فراک اور بڑے دوپٹے پہنیں تو دیکھیں کہ آپ کتنی حسین لگیں گی۔‘

اُنہوں نے اداکارؤں کو مخاطب کرتے ہوئے کہا کہ’آپ پاکستانی طرز کے لباس پہننے کے بجائے چھوٹی چھوٹی اور نامناسب میکسیاں پہن کر آتی ہیں جو مجھے بلکل اچھا نہیں لگتا ۔‘

اُنہوں نے مزید کہا کہ ’آپ اپنا کلچر چھوڑ کر دوسروں کا کلچر اپنا رہی ہیں۔‘