کورونا وائرس کے باعث پروازیں معطل ہونے کے پیش نظر مسقط میں پھنسے 150 پاکستانی عمان کی سلام ائری کی خصوصی پروازکے ذریعے کراچی پہنچ گئے ہیں، جب کہ اسی پرواز کے ذریعےپاکستان میں پھنسے15 خواتین سمیت 55 عمانی شہریوں کو مسقط روانہ کردیاگیا۔

تفصیلات کے مطابق پاکستانیوں کو لانے والی خصوصی پروازاو وی 9205 کے مسافروں میں عمان سے بے دخل کیے گئے پاکستانی شہری بھی شامل تھے جو مسقط کی جیل میں قید تھے اور عالمی وبا کی وجہ سے عمان کے سلطان کی خصوصی ہدایت پر انہیں رہا کر کے پاکستان بھیجا گیا ہے۔

ایوی ایشن ذرائع نے بتایا کہ کراچی ائیرپورٹ پہنچتے ہی تمام مسافروں کو کورونا وائرس کی اسکینگ کے بعد خصوصی انتظامات کے تحت قرنطینہ سینٹر منتقل کر دیا گیا ہے۔

اس سلسلے میں کمشنر کراچی کی ہدایت پر چھ خصوصی ائیرکنڈیشن مسافر گاڑیاں کراچی ائرپورٹ پر مامور کی گئی تھیں۔

دوسری جانب ائیرپورٹ ذرائع کاکہناہےکہ عمان حکومت کی درخواست پر پاکستان نے سلام ائرا کی خصوصی پرواز کو اپنے شہری واپس لے جانے کے لیے کراچی لینڈنگ کی اجازت دی۔

کراچی کے عمان قونصلیٹ کے توسط سے 15 خواتین سمیت 55 مسافر اسی فلائٹ او وی 9206 سے مسقط گئے، جناح ٹرمینل پر سول ایوی ایشن اسٹاف نے ان مسافروں کو اسکیننگ کے بعد مکمل سینی ٹائز کیا جب کہ ان کے سامان پر بھی جراثیم کش اسپرے کیا گیا۔

عمان قونصلیٹ کی فراہم کردہ فہرست کے مطابق ہی تمام مسافروں کو فلائٹ کے لیے بورڈنگ دی گئی۔