نامور بالی ووڈ اداکار عرفان خان کی گزشتہ روز طبعیت شدید ناساز ہوگئی، جس کے بعد انہیں ممبئی میں موجود اسپتال کے انتہائی نگہداشت یونٹ میں داخل کروا دیا گیا۔

بھارتی میڈیا کی رپورٹس کے مطابق عرفان خان کے ترجمان کا کہنا ہے کہ اداکار کو کولون انفیکشن سے متاثر ہونے پر اسپتال منتقل کیا گیا جہاں طبعیت شدید بگڑ گئی جس کے باعث انہیں آئی سی یو منتقل کرنا پڑا۔

53سالہ اداکار ممبئی کے مقامی اسپتال میں زیرعلاج ہیں اور اس وقت  آئی سی یو میں ڈاکٹروں کے زیر مشاہدہ ہیں۔

عرفان خان کے ترجمان کا کہناہے کہ مداحوں کو اداکار کی طبعیت کے حوالے سے آگاہ کیا جاتا رہے گا، عوام اداکار کی طبعیت کے حوالے سے کسی بھی قسم کی افواہوں پر یقین نہ کریں۔

ترجمان کی جانب سے جاری بیان میں یہ بھی کہا گیا کہ عرفان خان  اپنی ہمت و بہادری سے موذی مرض کینسر کو شکست دے چکے ہیں ، اس انفیکشن سے بھی وہ جلد صحتیاب ہوجائیں گے۔

واضح رہے کہ عرفان کی والدہ تین روز قبل بھارتی ریاست راجستھان کے شہر جےپور میں انتقال کرگئیں تھیں، ملک گیر لاک ڈاؤن ہونے کے باعث عرفان خان نے والدہ کے جنازے میں ویڈیو کانفرنس کال کے ذریعے شرکت کی تھی۔

عرفان خان کو 2018 میں کینسر کی تشخیص ہوئی تھی، بعد ازاں وہ اپنا علاج کرانے کے لیے امریکا چلے گئے تھے۔