امریکی محکمہ صحت کے ماہرین نے کہاہے کہ پرسکون نیند لے کر کورونا وائرس کو شکست دی جاسکتی ہے۔

غیرملکی خبررساں ادارے کی رپورٹ کے مطابق امریکی محکمہ صحت کے ماہرین کے مطابق پرسکون نیند ہمارے مدافعتی نظام کے لیے ضروری ہے اور مضبوط مدافعتی نظام کورونا وائرس کے خلاف لڑنے کے لیے ضروری ہے، پرسکون نیند ہمیں کورونا وائرس سے لڑںے کی طاقت دے سکتی ہے۔

امریکی سائنسدانوں کا کہنا ہے کہ مدافعتی نظام ہمارے جسم کا دفاعی سسٹم ہے جو حفاظت کی کئی تہیں فراہم کرتا ہے، اس کی پہلی تہہ ہماری جلد ہے جو انتہائی مضبوطی سے بنے ہوئے خلیوں سے بنی ہے اور وائرس اور بیکٹیریا کو جسم میں داخل ہونے سے روکتی ہے۔

ماہرین کے مطابق ایک تہہ پھیپھڑوں کے اندر ہے جو باریک بالوں کی شکل میں ہوتی ہے اور پھیپھڑوں میں داخل ہونے کی کوشش کرنے والے وائرس اور بیکٹیریا کو باہر دھکیل کر سانس کے اوپری راستے کی طرف پھینکتی ہے جہاں سے یہ وائرس اور بیکٹیریا معدے میں چلے جاتے ہیں اور وہاں معدے کے کئی قسم کے تیزاب ان کا خاتمہ کردیتے ہیں۔

ماہرین کا کہنا ہے یہ تمام تہیں پرسکون نیند سے بہت مضبوط ہوتی ہیں اور ان کی کارکردگی میں اضافہ ہوتا ہے، چنانچہ وبا کے ان دنوں میں پرسکون نیند لینا کورونا وائرس سے بچنے کے لیے انتہائی مفید ثابت ہوسکتا ہے۔