بلوچستان کے ضلع بارکھان میں ٹڈی دل نے فصلوں پر حملہ کردیا جس کے نتیجے میں فصلوں کوشدید نقصان پہنچا ہے۔

تفصیلات کےمطابق ٹڈی دل کے فصلوں پرحملے میں کپاس کی فصل تباہ ہوگئی جبکہ مرچ، پیاز اور ٹماٹر کی فصلوں کو بھی شدید نقصان پہنچا ہے۔ جس کےبعد صوبائی محکمہ زراعت نے متاثرہ علاقوں میں اسپرے کا کام شروع کردیا ہے

اس سے قبل گزشتہ ہفتے سندھ کے ضلع نواب شاہ میں ٹڈی دَل کے فصلوں پر حملے کے نتیجےمیں کپاس، گنا، جوار اور پیاز کی فصل تباہ ہوئی۔

نواب شاہ کی تحصیل دوڑ کی یونین کونسل اباوڑی ساوڑی، سھیلو اور سومر جمالی میں ٹڈی دَل نے حملہ کیا تھاجس کے نتیجے میں تیار فصلیں تباہ ہوگئیں۔

کاشتکاروں کا کہنا ہے کہ ٹڈی دَل کے فصلوں پر حملےسے بچاو کیلئے حکومت اقدامات کرےاوراس  کے خاتمہ کے لیے اسپرے کرے۔

واضح رہے کہ گزشتہ سال کے اختتام اور رواں سال کے شروع میں بھی ٹڈی دل نے ملک کے مختلف علاقوں پر حملہ کیا تھا جس کی وجہ سے پنجاب، بلوچستان اور سندھ کے بیشتر علاقوں میں فصلوں کو نقصان پہنچا تھا۔

ملک میں ٹڈی دل کے حملے سے بچاو کیلئےحکومت پاکستان کی کاوشوں کو مزید تقویت دینے کے لیے ترکی نے اپنی خدمات  پاکستان کو فراہم کی ہیں۔

پاکستان میں ٹڈی دل کے خاتمے کےلیے اسپرے والا خصوصی جہاز ترکی سے پاکستان پہنچا، اس کیلئے پاک فضائیہ کا سی ون تھرٹی طیارہ خصوصی جہاز پائپربریو لینے کے لیے ترک شہر ادانا گیا تھا۔

خصوصی جہاز چار افرادکئ عملے پر مشتمل ہے اور پاکستان آیاہے اور یہاں اسے اسمبل کرنے کے بعد ٹڈی دل سے متاثرہ علاقوں میں بھیجا جائے گا۔

ٹڈی دل کے خاتمے کے لیے ملک بھر میں خصوصا ’سندھ اور پنجاب کے اضلاع‘ میں اسپرےکیے جائیں گے۔