ملک بھرمیں آج سےمحدود پیمانے پر فلائٹ آپریشن شروع کیاجارہاہے۔

تفصیلات کے مطابق قومی ائیر لائن اور نجی ائیرلائنز آج سے اندرون ملک پروازوں کا سلسلہ شروع کررہی ہیں  اور ابتدائی مرحلے میں آج سےلاہور، اسلام آباد، کراچی، کوئٹہ اور پشاور میں فلائٹ آپریشن بحال ہوگا۔

پرواز کی روانگی سے قبل طیارے میں اسپرے کے بعد سول ایوی ایشن سے سرٹیفکیٹ لینا لازمی ہے،ملک بھر کے 5 مخصوص ائیرپورٹس پر اندرون ملک روانگی اور آمد پرڈس انفیکٹنٹ اسپرے کیا جائے گا۔

ذرائع کے مطابق ائیرپورٹ اسٹاف اور مسافرپارکنگ ایریاز سےآگے نہیں جاسکیں گے اور  ہر قسم کا پروٹوکول ختم کردیا گیا ہے جب کہ عملے کے لیے حفاظتی لباس، این 95 ماسک اور سرجیکل گلوزکا استعمال لازمی ہوگا، اس کے علاوہ مسافروں کو جہازمیں کھانا فراہم نہیں کیا جائے گا۔

سول ایوی ایشن کی جانب سےانٹرنیشنل فلائٹس کی معطلی میں 30 مئی تک توسیع کردی ہے تاہم بیرون ملک 7 ہزار پاکستانیوں کو عید سے پہلے واپس لانے کا اعلان کیا گیاہے۔

ذرائع کے مطابق عید سے پہلےامریکا سے 12 فلائٹس مسافروں کو وطن لائیں گی جب کہ ووہان اور چین میں پھنسے طالبعلموں کو لینے پرواز 18 مئی کو روانہ ہوگی۔

خیال رہے کہ چین میں پھنسے پاکستانی طلبا کے والدین سے وزیراعظم کے معاون خصوصی زلفی بخاری نے سے ملاقات کی اور کہا کہ حکومت ان طلبا کی وطن واپسی کےلیے رعایتی ائیرٹکٹس کی سہولت فراہم کرے گی اور 18 مئی کو چین سے 300 طلبا وطن واپس پہنچیں گے۔