فیاض الحسن چوہان کا کہنا ہے کہ لیگی قیادت اشتہاری نواز شریف اور خودساختہ روپوش شہباز شریف کو بچانے کے لیے الزام تراشیوں میں لگی ہے۔ 

تفصیلات کے مطابق وزیرِ اطلاعات پنجاب فیاض الحسن چوہان نےترجمان ن لیگ کے بیانات پر ردعمل دیتے ہوئے کہا ہے کہ آٹا چینی کمیشن کی رپورٹ ن لیگی قیادت کی سیاست پر کالا دھبہ بن کر سامنے آئی ہے۔

فیاض الحسن چوہان نے کہا کہ 2017  میں عالمی منڈی میں چینی کی قیمت 100 ڈالر فی ٹن زائد تھی لیکن شاہد خاقان عباسی نے آل شریف کو خوش کرنے کے لیے 20 ارب کی صورت میں تاریخی سبسڈی دی۔

 وزیرِ اطلاعات پنجاب نے کہا کہ تحقیقاتی رپورٹ کی صورت میں ن لیگی قیادت کی سیاست اور اخلاقیات کی دھجیاں اڑ گئی ہیں،آلِ شریف منی لانڈرنگ، اقربا پروری اور کرپشن کی صورت میں ٹی ٹی کی سیاست کر رہی ہے۔

ن لیگی ترجمان چیخنے چلانے اور دشنام طرازی کی صورت میں ٹاں ٹاں کی سیاست کر رہے ہیں۔

پاکستان تحریکِ انصاف کورونا وائرس کے باعث مشکل حالات میں بھی عوام کو ریلیف دے رہی ہے۔

انھوں نے کہا کہ سستی روٹی اور آٹا سبسڈی کے نام پر عوام کو اربوں کا چونا لگانے والے شوباز شریف تھے،سب جانتے ہیں حمزہ شہباز پولٹری مافیا کے ذریعے اپنی جیبیں بھرتے رہے۔

وزیرِ اطلاعات پنجاب نے کہا کہ پاکستان کی تاریخ میں پہلی دفعہ کسی تحقیقاتی کمیشن کی رپورٹ پبلک کی گئی ہے۔