ملک بھر میں پاکستانی آج عیدالفطر کورونا وائرس اور طیارہ حادثے کے سبب سادگی کے ساتھ  منارہے ہیں۔

تفصیلات کے مطابق ملک کے مختلف شہروں میں عیدالفطر کی نماز ادا کردی گئی۔ اس موقع پر مساجد، عید گاہوں اور امام بارگاہوں میں چھوٹے بڑے اجتماعات ہوئے، اور کورونا وائرس اور ملک میں ناگہانی آفتوں سے نجات کیلئے خصوصی دعائیں مانگی گئیں۔

اس موقع پر نمازعید کے اجتماعات میں طیارہ حادثے کے شہدا کی مغفرت اور ان کے اہلخانہ کیلئے صبر جمیل کیلئے دعائیں کی گئیں، نماز عید میں ملکی ترقی خوشحالی اور سلامتی کے لئےبھی رب کے حضور گڑگڑا کر دعائیں مانگی گئیں۔

نماز عید کے بعد لوگوں نے ایک دوسرے کو مبارکباد دی اور نیک جذبات کا اظہار کیا۔

وفاقی دارالحکومت میں عید کا سب سے بڑا اجتماع شاہ فیصل مسجد جب کہ راولپنڈی میں لیاقت باغ میں ہوا جہاں نمازیوں کی بڑی تعداد نے شرکت کی۔

کورونا سے حفاظتی انتظامات کیلئے ایس او پیز پر مکمل عملدرآمدکرتے ہوئےلاہور  کی 5 ہزار مساجد اور 190سے زائد کھلے مقامات پر نماز عید ادا کی گئی۔

عید کے اجتماعات میں سینیٹائزرکے استعمال اور سماجی فاصلے کا خاص خیال رکھا گیا۔

اس موقع پر سینیٹائزرکے استعمال اور سماجی فاصلے کا خاص خیال رکھنے کے ساتھ  سیکیورٹی کے خصوصی انتظامات بھی  خاطر میں لائے گئے۔

کوئٹہ اوراس کے نواحی علاقوں میں 300 سے زائد مقامات پر عید کی نماز کی ادائیگی کیلئےاجتماعات ہوئے جب کہ شہر میں نماز عید کا سب سے بڑا اجتماع مرکزی عیدگاہ طوغی روڈ پرمنعقد ہوا۔

پشاور میں مرکزی عید گاہ چارسدہ روڈ پر عید کی نماز کی ادائیگی کی گئی، اجتماعات میں کورونا وائرس سے نجات کیلئے خصوصی دعائیں مانگی گئیں۔