کورونا وائرس میں مبتلا سندھ پولیس کا سب انسپکٹر محمد حنیف جاں بحق ہوگیا۔

تفصیلات کے مطابق کراچی کےعلاقے ملیر میں تعینات سب انسپکٹر محمد حنیف کورونا وائرس کا شکار ہوکر شہید ہوگئے۔

ویلفیئر حکام سندھ پولیس کا کہنا ہے کہ سب انسپکٹر حنیف کا کورونا ٹیسٹ 7 مئی کو مثبت آیا تھا۔

سب انسپکٹرحنیف کی  وفات سے قبل جناح اسپتال میں بنائی گئی ویڈیو سامنے آئی ہے جس میں انہوں نے محکمے کے افسران سے داد رسی نہ ہونے کا  شکوہ کیا ہے۔

سب انسپکٹر محمد حنیف کے 24اپریل کو ریکارڈ کیے گئے ویڈیو بیان میں کہا گیا ہے کہ ٹیسٹ کرانے آیا ہوں کسی نے صبح سے نہیں پوچھا۔

ویلفیئرحکام نے کہا کہ سب انسپکٹر حنیف نے کورونا ٹیسٹ کی غرض سے آنے کا نہیں بتایا تھا اور نہ جناح اسپتال میں اپنی شناخت  ظاہر کی تھی بلکہ وہ عام مریض کی حیثیت سے اسپتال میں علاج کرانے پہنچے تھے۔

ویلفیئر حکام نے مزید کہا کہ سندھ بھر میں ضلعی سطح پر محکمے کے فوکل پرسن مقرر ہیں، سب انسپکٹر حنیف کا کیس علم میں آنے کے بعد محکمے نے مستقل داد رسی کی۔

دوسری جانب جناح اسپتال کی ایگزیکٹو ڈائریکٹر ڈاکٹر سیمی جمالی کا کہنا ہے کہ سب انسپکٹر محمد حنیف  نام کا کوئی شخص اسپتال نہیں آیا۔

انہوں نے کہا کہ اسپتال میں کوئی پرائیویٹ ٹیسٹ نہیں ہوتا، سرکاری ٹیسٹ ہوتا ہے جس کا کوئی پیسہ نہیں لیا جاتا۔

خیال رہے کہ ملک بھر میں کورونا وائرس سے جاں بحق افراد کی تعداد 737 ہوگئی جبکہ اس مہلک وبا میں مبتلا مریضوں کی تعداد 34 ہزار 336 تک پہنچ گئی۔