کراچی میں گرمی سے ستائی ہوئی عوام کو شہر میں کئی کئی گھنٹے غیر اعلانیہ لوڈشیڈنگ کا سامنا کرنا پڑھ رہاہے ۔

تفصیلات کے مطابق کیماڑی بھٹہ ویلیج میں 3 گھنٹے غیراعلانیہ بجلی کی فراہمی معطل رہی  جبکہ شانتی نگر میں بھی لوڈشیڈنگ فری علاقہ ہونے کے باوجود ایک گھنٹہ بجلی کی فراہمی معطل رہی۔

گارڈن کے علاقے میں بھی کئی گھنٹے سے بجلی کی فراہمی معطل جبکہ  لیاقت آباد سی ون ایریا میں رات 11 بجے سے بجلی کی فراہمی معطل ہے۔

علاقہ مکینوں کا کہنا ہے کہ گزشتہ 17 روزسےغیر اعلانیہ لوڈشیڈنگ کا سلسلہ جاری ہے،علاقے میں لوڈ شیڈنگ کا دورانیہ 3 گھنٹے کا ہے، تاہم آج کل 3 گھنٹے کے بجائے 8 سے 10 گھنٹوں کی لوڈ شیڈنگ کی جارہی ہے۔

دوسری جانب ترجمان کے الیکٹرک کے مطابق گلزار ہجری ،ٹیچرز سوسائٹی، کیماڑی اور کنیز فاطمہ سمیت دیگر علاقوں میں بجلی بحال ہے جن علاقوں میں بجلی چوری کی شرح زیادہ ہے  وہاں این پی پی کے تحت لوڈشیڈنگ کی جاتی ہے۔

ترجمان کے الیکٹرک کا کہناتھا کہ چوری کی وجہ سے بجلی کے انفرااسٹرکچر کو بھی نقصان پہنچتا ہے اور ٹرپنگ میں اضافہ ہوتا ہے تاہم ،تکنیکی یا علاقائی فالٹس کے باعث آنے والے تعطل کو فوری درست کیا جاتا ہے ۔

ترجمان کے الیکڑک نے کہا ہے کہ علاقائی فالٹس کی درستگی کے لیے صارفین 118 سے فوری رابطہ کریں۔