وزیر اعظم عمران خان کے ترجمان ندیم افضل چن کے لیک ہونے والے واٹس ایپ آڈیو میسج سے مشہور ہونے والا شخص ’مختاریا‘ کورونا میں مبتلا ہوگیا۔

اپنے ایک ویڈیو پیغام میں ندیم افضل چن نے بتایا کہ انکے دوست مختاریا جو کہ آڈیو پیغام لیک ہونے کے بعد مشہور ہوئےتھے، ان میں کورونا کی تشخیص ہوئی ہے۔

انہوں نے بتایا کہ میرے کئی مرتبہ سمجھانے کے باوجود مختاریا نے عید پر احتیاطی تدابیر کا خیال نہ رکھا اور کورونا میں مبتلا ہوگئے اور اب وہ گھر میں قرنطینہ میں ہیں۔

ویڈیو پیغام میں ندیم افضل چن نے قریبی دوست کے کورونا میں مبتلا ہونے کے بعد پُرزور انداز میں لوگوں سے احتیاطی تدابیر اختیار کرنے کی درخواست کی۔

ویڈیو کے آخر میں ندیم افضل چن نے’ مختارے‘ کا ویڈیو پیغام شیئر بھی کیا، جن کا کہنا تھا کہ اس نے چن صاحب کے کہنے پر بہت احتیاط کی لیکن اسکے باوجود وہ کورونا وائرس کا شکار ہوگیا۔

ویڈیو میں ندیم افضل چن کے قریبی دوست مختار حسین باجوہ عرف مختاریا نے لوگوں سے اپیل کی کہ خدا کا واسطہ ہے کہ احتیاط کریں، ندیم افضل چن کی باتوں کو سنجیدہ لیں، خود بھی اس عالمی وبا سے بچیں اور اپنے بچوں کو بھی بچائیں اور ماسک کے بغیر باہر نہ نکلیں۔

واضح رہے کہ ندیم افضل چن اپنی ایک لیک آڈیو میں کہتے ہیں کہ ’بہت سیریس بیماری ہوگئی ہے، گھر کے اندر چپ کر کے بیٹھو اور بچوں کو بھی باہر نہ نکلنے دو۔‘

معاون خصوصی کےآڈیو میسج کے لیک ہونے اور سوشل میڈیا پر وائرل ہونے کے بعد انہوں نے اپنے ایک ویڈیو پیغام میں لوگوں کی ملاقات قریبی دوست مختاریا سے کروائی تھی۔