تحریک انصاف کے رکن اسمبلی ریاض فتیانہ کا کہناہے کہ ٹڈیوں کےبارے میں کہا جاتا ہے کہ اس کوکھانےسےکورونا ختم ہوسکتا ہے، حکومت ٹڈیوں کے حوالے سے تحقیق کرا لے۔

قومی اسمبلی میں اظہار خیال کرتے ہوئے تحریک انصاف کے رکن نے کہا کہ حکومت ٹڈیوں کے حوالے سے تحقیق کرا لے، اگریہ حقیقت ہے تو قوم ٹڈیوں کا خود ہی تیا پانچا کردیگی۔

بجٹ پر بات کرتے ہوئے انہوں نے کہا کہ بجٹ میں کوئی نیا ٹیکس نہیں لگا،حکومت نے مشکل حالات میں اچھا بجٹ پیش کیا ہے، کورونا کی وجہ سے طبی سامان کی قیمتوں میں کئی گنا اضافہ ہوگیا۔

خیال رہے کہ پنجاب اور سندھ کے زرعی علاقوں میں ٹڈی دل فصلوں پر حملہ آور ہیں،  راجن پور کے شہری اور دیگر زرعی علاقوں میں مسلسل ایک ہفتے سے ٹڈیوں کی یلغار جاری ہے، ٹڈیوں نے ہزاروں ایکڑ پر کاشت کپاس اور دیگر فصلوں کو شدید نقصان پہنچایا ہے، ضلعی انتظامیہ کا ٹڈیوں کے خلاف آپریشن جاری ہے۔

راجن پور کی شہری آبادی اور نواحی علاقوں محمد پور،فتح پور ،گم والا ،فاضل پور ،کومٹھن ،روجھان سیمت دیگر میں ٹڈیوں کے حملے سے ہزاروں ایکڑ پر کاشت فصلات اور باغات کو بہت نقصان ہوا ہے ۔

ذرائع کے مطابق ان علاقوں میں کئی ایکڑ کاشت کپاس کو ٹڈیوں نے تباہ کردیا ہے جس سے کسان شدید پریشان ہیں، متاثرہ علاقوں کے کاشتکاروں نے حکومت سے اپنے نقصان کے ازالہ کا مطالبہ کیا ہے۔