ترجمان دفتر خارجہ کا کہناہے کہ بھارت کو آئندہ بھی اپنے عزائم میں ناکامی ہوگی۔

دفتر خارجہ کی ترجمان عائشہ فاروقی کا کہناہے کہ مقبوضہ کشمیرمیں بھارت کی جانب سے لگائی گئی پابندیوں اور غیر قانونی کارروائیوں کو 10 ماہ ہوگئے۔ بھارت نے مقبوضہ کشمیر پر غیر قانونی قبضہ برقرار رکھنے کے لیے ظلم وستم کی ہر کوشش جاری رکھی۔

ترجمان کا کہناہے کہ مقبوضہ کشمیر میں بھارت جعلی پولیس مقابلوں کی آڑ میں معصوم کشمیریوں کا خون بہا رہا ہےجبکہ بھارت میں مسلمانوں پر ظلم بی جے پی، آر ایس ایس سے متاثر انتہا پسند ہندوتوا ذہنیت کا نتیجہ ہے۔

ترجمان کا کہناہے کہ کشمیریوں اور بھارتی مسلمانوں پر ظلم و جبر کی پاداش میں عالمی برادری کو جوابدہ ہےاور اس کو سمجھ لینا چاہیئےکہ  7 دہائیوں سےوہ  کشمیریوں کو محکوم  اور اپنے تابع کرنے میں ناکام رہا ہے اور اسے آئندہ بھی اپنے عزائم میں ناکامی نصیب ہوگی۔

انہوں نے کہا کہ عالمی برادری کو مقبوضہ کشمیر میں انسانی حقوق کی صورتحال کا فوری نوٹس لینا چاہیے، عالمی برادری جنوبی ایشیا میں امن و سلامتی کے تحفظ کے لیے اپنا کردار ادا کرے۔

خیال رہے کہ گزشتہ روز پاک فوج نے ایک اور بھارتی جاسوس کواڈ کاپٹر طیاہ مارا گرایا ہے۔

آئی ایس پی آر کے مطابق بھارتی جاسوس کواڈ کاپٹر کو ایل او سی کے خنجر سیکٹر میں گرایا گیا ہے جو 500 میٹر تک پاکستانی حدود میں آ گیا تھا۔

واضح رہے کہ پاکستان کی جانب سے مار گرائے جانے والا یہ پانچواں بھارتی ڈرون ہے۔