سابق وزیر داخلہ اور پاکستان پیپلز پارٹی (پی پی پی) کے سینیٹر رحمان ملک نے  پاکستان میں مقیم امریکی بلاگرخاتون سنتھیا ڈی رچی کی جانب سے لگائے گئے الزامات کی تردید کرتے ہوئے انہیں بے بنیاد، من گھڑت اور بیہودہ قرار دے دیا۔

تفصیلات کے مطابق رحمان ملک کے ترجمان کی جانب سے جاری بیان میں کہا گیا ہے کہ سابق وزیر داخلہ امریکی خاتون کے من گھڑت، بیہودہ الزامات کا جواب دینا توہین سمجھتے ہیں، امریکی بلاگر خاتون کے الزامات بدنیتی پر مبنی ہیں جس کا مقصد سینیٹر رحمان ملک کی ساکھ کو نقصان پہنچانا ہے۔

ترجمان نے بیان میں کہا کہ امریکی خاتون نے سینیٹر رحمان ملک کے خلاف نازیبا الزامات کسی مخصوص فرد یا گروہ کے اکسانے پر لگائے ہیں۔

 ترجمان کا کہناہے کہ سینیٹر رحمان ملک سنتھیا ڈی رچی کا بطور خاتون اور تمام خواتین کا احترام کرتے ہیں اور انہوں نے ہمیشہ خواتین کے حقوق اور وقار کے لئے آواز بلند کی ہے۔

ترجمان کا مزید کہناتھا کہ سینیٹر رحمان ملک نے بحیثیت چیئرمین سینیٹ قائمہ کمیٹی داخلہ امریکی بلاگر کا محترمہ بینظیر بھٹو شہید کے خلاف لگائے گئے بیہودہ الزامات کا نوٹس لیا تھا جس پر امریکی خاتون نے سینیٹر رحمان ملک پر بیہودہ اور من گھڑت الزامات کی بوچھاڑ کردی۔

ان کا مزیید کہناتھا کہ سینیٹر رحمان ملک کے بیٹوں کی جانب سے آزادانہ طور پر اپنے وکیلوں سے ضروری قانونی رائے  مانگ لی گئی ہے۔

واضح رہے کہ امریکی خاتون سنتھیا رچی کی جانب سےگزشتہ روز فیس بک پر جاری  ایک ویڈیو میں پاکستان پیپلز پارٹی کے رہنماؤں پر زیادتی اور تشدد کے سنگین الزامات عائد کیے گئے ہیں۔

سنتھیا نےاپنے ویڈیو پیغام میں الزام عائد کرتے ہوئے دعویٰ کیا کہ 2011 میں پیپلز پارٹی کے دورِ حکومت میں اس وقت کے وزیرِ داخلہ رحمان ملک نے ان کے ساتھ زیادتی کی۔

انہوں نے مزید بتایا کہ  اس وقت کے وزیرِ اعظم یوسف رضا گیلانی اور ان کی کابینہ کے رکن مخدوم شہاب الدین نے بھی انھیں جسمانی طور ہر ہراساں کیا۔