چین نے  آج  صبح  چینگڈو شہر  میں امریکی قونصل خانے کو اپنے  کنٹرول میں لے لیا ہے ۔

چینی  میڈیا کے مطابق  چین کےشہرچینگڈو میں امریکی قونصل خانے کی عمارت پر لگا امریکی پرچم بھی نیچے کر دیا گیا ہے۔

اس کے علاوہ امریکی قونصل خانے کے اطراف چینی پولیس کی نفری تعینات کردی گئی ہے۔

چینی وزارت خارجہ کا کہنا ہے کہ آج صبح دس بجے چینگ ڈو میں امریکی قونصل خانہ بند کیا گیا تھا، متعلقہ چینی حکام نے قونصل خانے کے اندر داخل ہو کر کنٹرول سنبھال لیا ہے

اتوار کے روز چین کے جنوب مغرب میں واقع شہر چینگدو میں متعدد شہریوں نے امریکی قونصل خانے کا رخ کیا۔ انہوں نے وہاں تصاویر بنائیں اور اس کے نزدیک چینی پرچم لہرائے۔

اس موقع پر سیکورٹی فورسز کی بھاری تعداد قونصل خانے کے اطراف موجود تھی۔

خیال رہے کہ اس سے قبل چینی حکومت نے جمعے کے روز اس قونصل خانے کو بند کر دینے کے احکامات جاری کیے تھے۔ یہ اقدام امریکا کی جانب سے ہیوسٹن شہر میں چینی قونصل خانے کی بندش کے جواب میں کیا گیا۔

امریکی صدر ڈونلڈ ٹرمپ نے منگل کے روز ہیوسٹن شہر میں چینی قونصل خانے کو جاسوسی کا مرکز شمار کرتے ہوئے اس کی بندش کے لیے 72 گھنٹوں کی مہلت دی تھی۔ اس کے نتیجے میں چین اور امریکا کے تعلقات میں پائی جانے والی کشیدگی میں مزید اضافہ ہو گیا۔