وزیراعظم عمران خان نے کہا ہے کہ عید الاضحیٰ پر عوام کو احتیاط کرنا ہوگی۔

تفصیلات کے مطابق وزیراعظم عمران خان کی زیر صدارت حکومتی ترجمانوں کا اجلاس ہوا جس میں وزیراعظم نے اہم قومی امور پر ترجمانوں کو اعتماد میں لیا۔

 ترجمانوں کے اجلاس میں اپوزیشن کی متوقع اے پی سی بھی زیر غور جبکہ ملکی سیاسی صورتحال پر گفتگو کی گئی اور کوویڈ 19 کے حوالے سے حکومتی حکمت عملی پر بحث بھی کی گئی۔

اجلاس میں وزیراعظم نے حکومتی ترجمانوں کو اہم ہدایات بھی دیں۔

وزیراعظم عمران خان نے کہا کہ حکومتی کامیاب حکمت عملی کی دنیا بھی معترف ہے، سمارٹ لاک ڈاؤن کے مثبت نتائج سامنے آرہے ہیں لیکن عید الاضحیٰ پر عوام کو احتیاط کرنا ہوگی۔

واضح رہے اس سے قبل عالمی وبا کورونا کی صورتحال میں وفاقی حکومت کا عیدالاضحیٰ پرصرف 3 چھٹیاں دینے کا پلان سامنے آگیا۔

وفاقی وزارت داخلہ کے سرکلر کے مطابق عیدالاضحیٰ پر 3 چھٹیاں دینے کا فیصلہ کیا گیا ہے جو ممکنہ طور پر 31 جولائی سے شروع ہونگی،عوام کو غیر ضروری سفر سے روکنے کے لیے اضافی تعطیلات نہیں دی جائیں گی۔

عیدالاضحیٰ پر کتنی چھٹیاں ہوں گی؟ فیصلہ سامنے آگیا

ذرائع کے مطابق رواں برس عیدالاضحیٰ جمعے کے روز ہونے کا امکان ہے جس پر عید کی تین تعطیلات ممکنہ طور پر جمعہ، ہفتہ اور اتوار کو ہوں گی۔