سپریم کورٹ آف پاکستان نے شوگر کمیشن رپورٹ پرعملدرآمد کا فیصلہ معطل کرنے کی درخواست مسترد کردی۔

تفصیلات کے مطابق چیف جسٹس پاکستان کی سربراہی میں 2 رکنی بینچ نے سندھ ہائیکورٹ کے عبوری حکم کے خلاف وفاق کی اپیل پر سماعت کی۔ اس دوارن اٹارنی جنرل عدالت میں پیش ہوئے۔

دوران سماعت جسٹس اعجاز الاحسن نے استفسار کیا کہ اٹارنی جنرل صاحب اسلام آباد ہائیکورٹ نے بھی مقدمے میں فیصلہ دیا ہے، کیا سندھ ہائیکورٹ کے علم میں یہ بات نہیں لائی گئی؟ اس پر اٹارنی جنرل نے کہا کہ شوگر ملز کی درخواست میں اسلام آباد ہائیکورٹ کے فیصلے کا ذکر ہے اور  سندھ ہائیکورٹ کے عبوری حکم میں اسلام آباد ہائیکورٹ کے فیصلے کا ذکر نہیں ہے، کمیشن رپورٹ میں شوگر ملز پر بہت سے الزامات سامنے آئے ہیں۔

اٹارنی جنرل کے جواب کے بعد چیف جسٹس نے استفسار کیا کہ کیا کمیشن کو شوگر ملز کواپنا مؤقف دینے کا موقع نہیں دینا چاہیے تھا؟جس پر اٹارنی جنرل نے کہا کہ فیکٹ فائنڈنگ کمیشن کے سامنے موقف دینے کی ضرورت نہیں تھی، تاحال کمیشن کی کارروائی کو کالعدم قرار نہیں دیا گیا، تمام ایگزیکٹو اتھارٹیز کو فعال کر دیا گیا ہے، کمیشن کی رپورٹ آنکھیں کھولنے کے مترادف ہے۔

جسٹس اعجاز الاحسن نے استفسار کیا کہ کیا کمیشن کی رپورٹ پر شوگر ملز کے خلاف کوئی ایکشن لیا گیا؟ اس پر اٹارنی جنرل نے بتایا کہ کچھ شوگر ملز مالکان خیبرپختونخوا اور کچھ بلوچستان ہائی کورٹ چلے گئےوہ نہیں چاہتے کہ رپورٹ پر کارروائی کی جائے۔

چیف جسٹس نے پوچھا کہ یہ محض کمیشن کی رپورٹ ہے، آپ حکم امتناع کیوں لینا چاہتے ہیں؟ اس پر شوگر ملز کے وکیل مخدوم علی خان نے مؤقف دیا کہ رپورٹ کے بعد ایگزیکٹو احکامات کو مالکان نے مختلف ہائی کورٹس میں چیلنج کررکھا ہے، ہائی کورٹس سے رجوع کرنا معمول سے ہٹ کر نہیں ہے۔

شوگر ملز کے وکیل نے کہا کہ عدالت نےیہ دیکھنا ہے کہ کیا کمیشن قانون کے مطابق بنایا گیا؟  کیا کمیشن غیر جانبدار تھا؟ یہ دیکھنا ہوگا کہ کیا کمیشن نے شوگر ملز مالکان کا موقف سنا؟

مخدوم علی خان نے کہا کہ اگر ان چیزوں کا خیال نہیں رکھا گیا  تواس معاملے میں عدالتیں مداخلت کرسکتی ہیں۔

مخدوم علی خان کے دلائل سننے کے بعد چیف جسٹس نے ریمارکس دیے کہ کمیشن کی رپورٹ شوگر مل مالکان کوکس طرح متاثر کرسکتی ہے؟ حکومت کئی مواقع پر کمیشن بنا چکی لیکن رپورٹس سامنے نہیں آئیں، کیا آپ چاہتے ہیں کہ عدالت کمیشن کی رپورٹ کالعدم قرار دے؟ شوگر کمیشن رپورٹ سے شوگرمل والوں کے حقوق کیسے متاثر ہوئے؟ شوگر کمیشن کی رپورٹ پر مل مالکان کی تشویش کیا ہے۔

جسٹس اعجازالاحسن نےاپنے ریمارکس میں کہا کہ بادی النظر میں شوگر کمیشن نے فیکٹ فائنڈنگ کی، کمیشن نے ڈیل اور بہت سی چیزوں کی نشاندہی بھی کی، کمیشن کی رپورٹ متعلقہ اداروں کو کارروائی کے لیے بھیجی گئی ہے، ریاستی ادارے اگر شوکاز نوٹس جاری کریں اپنا مؤقف وہاں پیش کریں۔

چیف جسٹس نے ریمارکس میں کہا کہ ابھی کسی شوگر مل کے خلاف کوئی کارروائی عمل میں نہیں لائی گئی۔

جسٹس اعجاز کا کہنا تھا کہ رپورٹ کے مطابق شوگر مل والوں کو نہیں سنا گیا، چینی کی قیمتیں بڑھنے پر پورے پاکستان میں شور مچا، کمیشن ممبران کے نام سب کے سامنے تھے اور کسی نے چیلنج نہیں کیا، کمیشن کی تشکیل غیرقانونی تھی تو وہ پہلے چیلنج کیوں نہیں کی گئی؟ کمیشن کے ارکان شوگر ملز کے خلاف کیوں جانبدار ہوں گے؟ یہ بہت بڑا مسئلہ ہے جس سے لوگ متاثر ہوئے ہیں۔

چیف جسٹس پاکستان نے استفسارکرتے ہوئے کہاکہ کیا شوگر کمیشن رپورٹ شائع ہوچکی ہے؟ کیا شوگر کمیشن رپورٹ بطور ثبوت استعمال ہوسکتی ہے؟ شوگر مل ایسوسی ایشن کمیشن کی رپورٹ سے جان نہیں چھڑوا سکتی، کمیشن غیر قانونی قرار دے دیں تو پھر بھی ختم نہیں ہوگی، ریگولیٹری اداروں کو کام سے نہیں روکا جاسکتا، کمیشن رپورٹ کالعدم بھی ہوجائےتو شوگر ملز کو کچھ نہیں ملنا۔

جسٹس گلزار احمد نے ریمارکس دیے کہ اب ممکن نہیں کہ کچھ ملزکے خلاف کارروائی سے روکا جائے اور باقی کےخلاف کارروائی جاری رہے، ادارے رپورٹ کا حوالہ دیے بغیر کارروائی جاری رکھ سکتے ہیں۔

اٹارنی جنرل نے عدالت کو بتایا کہ سندھ ہائیکورٹ سے 12 شوگر ملز نے رجوع کر رکھا ہے، ہائیکورٹ کا حکم درخواست گزار  12 شوگر ملز کی حد تک ہے اور درخواست گزار شوگر ملز کو چھوڑ کر باقی شوگر ملز کے خلاف کارروائی جاری رہے گی۔

عدالت نے اٹارنی جنرل اور شوگر ملز مالکان کے وکیل کے دلائل سننے کے بعد شوگر کمیشن رپورٹ پر عملدرآمد کا فیصلہ معطل کرنے کی درخواست مسترد کردی۔

اس کے علاوہ شوگر ملز ایسوسی ایشن کے وکلا سے تحریری دلائل طلب  کرلیے گئے، کیس کی مزید سماعت 14 جولائی تک ملتوی کردی گئی ۔