حکومتِ پنجاب  کیجانب سے کورونا وائرس کے پھیلاو کو روکنے کیلئے صوبہ میں اسمارٹ لاک ڈاؤن نافذ کرنے کا فیصلہ کر لیاگیا ہے،فیصلے کے تحت بازار، مارکیٹیں  اور پلازےعید سے دو تین روز قبل بند کردیئے جائیں گے۔

تفصیلات کے مطابق پنجاب حکومت نےعید کے موقع پر اسمارٹ لاک ڈاؤن کا فیصلہ کیا ہے،  اس سلسلے میں  وزیراعلیٰ پنجاب عثمان بزدار نے اسمارٹ لاک ڈائون کرنے کی منظوری دے دی ہے۔

چیف سیکرٹری پنجاب جواد رفیق کی زیر صدارت اجلاس منعقد ہوا جس میں اسمارٹ لاک ڈاؤن اور مویشی منڈیوں میں ایس او پیز پر عملدرآمد کیلئے انتظامات کا جائزہ لیا گیا۔

اجلاس میں بتایا گیا کہ عید سے قبل اسمارٹ لاک ڈاون پیشگی اعلان کے بجائے اچانک  ہوگا اور بازار مارکیٹیں  اور پلازےعید سے دو تین روز قبل بند کردیئے جائیں گے جبکہ  مویشی منڈیاں ،یوٹیلیٹی اسٹور ،دودھ دہی دکانیں ،تندور  اور میڈیکل اسٹور کھلے رہیں گے۔

چیف سیکرٹری کا کہنا تھا کہ عید سے قبل بازاروں میں خریداری کی سرگرمیوں سے کورونا وائرس پھیلنے کا خدشہ ہے۔صوبائی حکومت نے عید الفطر کے تجربے کو مدنظر رکھتے ہوئے مفاد عامہ میں اسمارٹ لاک ڈاؤن کا فیصلہ کیا ہے۔ فیصلہ وفاقی حکومت کی ہدایات کی روشنی میں کیا گیا ہے

انہوں نے ہدایت کی کہ  مویشی منڈیوں میں معمر افراد، بچوں کے داخلے پر پابندی، ماسک پہننے سمیت دیگر ایس او پیز پر عملدرآمد کرایا ۔