کراچی کے مختلف علاقوں میں صبح سویرے بوندا باندی کے باعث موسم خوشگوار ہوگیا، شہر کے کئی علاقوں میں بادل چھائے ہوئے ہیں۔

شہر کے جن علاقوں میں ہلکی بارش ہوئی ان میں گارڈن، صدر اور کلفٹن سمیت مختلف علاقے شامل ہیں۔

 محکمۂ موسمیات نے آج سندھ کے زیریں علاقوں میں بارش کی پیش گوئی کر رکھی ہے۔

ادھر بلوچستان کے صوبائی دارالخلافہ وادیٔ کوئٹہ اور گرد و نواح میں مطلع صاف اور موسم خشک ہے۔

محکمۂ موسمیات کے مطابق آج بھی بلوچستان کے بیشتر علاقوں میں مطلع صاف اور موسم شدید گرم رہنے کا امکان ہے، جبکہ آج خضدار، تربت، آواران اور لسبیلہ میں تیز ہواؤں اور گرج چمک کے ساتھ بارش ہو سکتی ہے۔

کوئٹہ کا موجودہ درجۂ حرارت 24 ڈگری سینٹی گریڈ ریکارڈ کیا گیا جبکہ آج زیادہ سے زیادہ درجۂ حرارت 36 ڈگری سینٹی گریڈ تک جانے کا امکان ہے۔

بلوچستان کے ساحلی علاقے گوادر میں درجۂ حرارت 30 ڈگری سینٹی گریڈ ریکارڈ کیا گیا، سبی میں موجودہ درجۂ حرارت 33 جبکہ زیادہ سے زیادہ درجہ حرارت 43 ڈگری سینٹی گریڈ تک جاسکتا ہے۔

نوکنڈی میں موجودہ درجۂ حرارت 31 جبکہ زیادہ سے زیادہ 44 ڈگری سینٹی گریڈ تک جانے کا امکان ہے۔

کوئٹہ شہر کی ہوا میں نمی کا تناسب 60 فیصد، گوادر میں 62 فیصد، سبی میں 45 فیصد اور نوکنڈی میں 8 فیصد ریکارڈ کیا گیا۔