پاکستان  اقوام متحدہ کی اقتصادی اور سماجی کونسل کا متفقہ طور پرچھٹی بار صدر منتخب ہوگیا۔

پاکستان اس کا چھٹی بار صدر منتخب ہوا ہے جبکہ اقوام متحدہ میں پاکستانی سفیر منیر اکرم دوسری بار اس کونسل کے صدر منتخب ہوئے ہیں۔

اپنے خطاب میں منیر اکرم کا کہنا تھا کہ  دنیا کو اس وقت کئی مسائل درپیش ہیں، کورونا کے عالمی معیشت اور صحت پر اثرات اور اس کا ممالک کی ترقی پر منفی اثر اہم مسئلہ ہے ،  کورونا کی ویکسین کی تمام ممالک تک رسائی ہماری ترجیحات میں شامل ہوگی۔

 منیر اکرم نے کہا کہ مقبوضہ علاقوں میں محصور اقوام پر خصوصی توجہ کی ضرورت ہے، کورونا ویکسین تک تمام ممالک کی رسائی ہماری ترجیحات میں شامل ہوگی۔

 اپنے  خطاب  میں  پاسکتانی  سفیر  کا  مزید  کہنا  تھا  کہ    عالمی انفرا اسٹرکچر، ترقیاتی منصوبوں کے لیے مالیاتی وسائل پر کام اور موسمیاتی تبدیلی کے خلاف عالمی کوششوں کو مزید مضبوط کرنا بھی پاکستان کی ترجیحات میں شامل ہیں، پاکستان بطور صدر سائنس اینڈ ٹیکنالوجی کے فروغ اور ترقی پذیر ممالک تک اس کی رسائی پر بھی خصوصی توجہ دے گا۔

واضح رہے کہ اقوام متحدہ کی تاریخ میں صرف 2 سفارتکار ایک سے زیادہ بار اس اہم عہدے پر رہ چکے ہیں،منیراکرم اس سے پہلے 2005 میں بھی اقتصادی اور سماجی کونسل کے صدر رہ چکے ہیں۔