قومی ائیر لائن (پی آئی اے) کے حکام کی جانب سے انکشاف کیا گیا ہے کہ امریکا میں پاکستان کی ملکیت روز ویلٹ ہوٹل نے سال 1997 سے سال 2019  تک 424 ملین ڈالر کمائے۔

سینیٹ کمیٹی کے اجلاس میں اپوزیشن کی جانب سے روز ویلٹ ہوٹل کی ممکنہ فروخت کے حکومتی فیصلے پر شدید احتجاج کیا گیا اور ہوٹل کے فروخت یا جوائنٹ وینچر کی مخالفت کردی گئی۔

پی آئی اے کے سینئر افسر نجیب کامران نے سینیٹ کی قائمہ کمیٹی برائے ہوابازی کے اجلاس میں بریفنگ کے دوران  بتایا کہ روز ویلٹ ہوٹل 1999 سے 2019 تک منافع میں تھا جب کہ کورونا کے باعث رواں برس ہوٹل کا منافع ختم ہو گیا۔

انہوں نے کہا کہ ہوٹل کو  پاکستان نے 1978 میں لیز  پر لیا تھا جب کہ 1999 میں 36.5 ملین ڈالر میں خریدلیا۔

نجیب کامران کا کہنا تھا کہ خطرہ ہے امریکا اسے قومی ورثہ نہ قرار دیدے، ویسے بھی عمارت پرانی ہو چکی ہے، ہوٹل خسارے میں رہے گا لہذا اسے فروخت کر دینا چاہیے۔

دوسری جانب چیئرمین کمیٹی سینیٹر مشاہد اللہ نےمخالفت کرتے ہوئے کہا کہ اگر ہوٹل خسارے میں جائےگا تو امریکی صدر اسے خریدنے میں دلچسپی کیوں رکھتے ہیں؟

سینیٹر مصطفی کھوکھر کے استفسار  پر  پی آئی اے کے افسر نے بتایا 1997 سے 2019 تک ہوٹل نے 424 ملین ڈالر کمائِے، مصطفی نواز نے کہا کہ اگر ہوٹل منافع میں ہے تو اسے فروخت کیوں کیا جا رہا ہے؟

اس موقع پروفاقی سیکریٹری ہوابازی حسن ناصر جامی نے کہا کہ ہوٹل کو فروخت نہیں کیا جارہا  جوائینٹ وینچر کیا جا رہا ہے۔

وفاقی وزیر غلام سرورخان نے کہا کہ حکومتی سطح پر ہم سے کوئی بھی رابطے میں نہیں، یہ معاملہ ابھی زیر بحث ہے جو بھی ہوگا شفاف انداز میں ہوگا، جو بھی کریں گے ملک کے وسیع تر مفاد میں کریں گے۔

اس موقع پر سینیٹ کمیٹی نے روز ویلٹ ہوٹل کی فروخت یا جوائنٹ وینچر کی مخالفت کرتے ہوئے مطالبہ کیا ہے کہ کورونا کے بعد اس ہوٹل کی تزئین و آرائش کی جائے۔