روس نے کوروناکے علاج کے لیے تیار اپنی ویکسین کے تمام تجرباتی مراحل مکمل ہونے پر کل اسے لانچ کرنے کا اعلان کیا ہے۔

غیر ملکی خبر رساں ادارے کے مطابق کورونا ویکسین ماسکو کی گامالیا انسٹی ٹیوٹ اور روسی وزرات دفاع کے اشتراک سے بنائی گئی ہے جس کے تینوں تجرباتی مراحل مکمل کر لیے گئے ہیں۔

 کورونا کی ویکسین کا دو ماہ تک انسانوں پرکلینکل تجربہ کیا گیا جس کے بہتر نتائج آنے پراب اسے مارکیٹ میں پیش کیا جارہا ہے ۔

 روسی صدرکی صاحبزادی نے رضاکارانہ طور پر اس ویکیسن کے کلینیکل تجربے میں خود کو پیش کیا تھا جس کے بہتر نتائج سامنے آئے اور اب وہ صحت یاب ہوچکی ہیں ۔

روسی نائب وزیر صحت کا کہنا ہے کہ تیار کردہ کورونا ویکسین کے انسانوں پر تینوں کلینیکل ٹرائلز کامیابی کے ساتھ مکمل کر لیے گئے ہیں اور اب اسے کل مارکیٹ میں پیش کردیا جائے گا۔

  وزارت ِ صحت کا کہنا ہے کہ ویکسین ابتدائی مراحل میں طبی عملے ، اساتذہ اور دیگر فلاحی اداروں کو دستیاب ہو گی ۔

دوسری جانب فلپائن کے صدر رودریگو نے روس کی کورونا  کے علاج کے لیے بنائی گئی ویکسین خریدنے کی آفر بھی قبول کر لی ہے۔

فلپائن کے صدر کا کہنا ہے کہ وہ رضاکارانہ طور پر پوری عوام کے سامنے ویکسین کا استعمال سب سے پہلے خود کریں گے۔

خیال رہے کہ گزشتہ دنوں روس کی فرسٹ ماسکو اسٹیٹ میڈیکل یونیورسٹی اور مین ملٹری کلینکل برڈنکل اسپتال کی 2 ٹیموں نے کورونا ویکسین کی تیاری کے سلسلے میں پہلا فیز مکمل کیا تھا۔

روسی حکام کا کہنا تھا کہ 10 یا 12 اگست تک ویکسین کے عام استعمال کی اجازت حاصل کرنے کی کوششیں جاری ہیں۔