سندھ کے ضلع سکھر کی تحصیل پنوعاقل میں پیش آنے والے قتل کے ہولناک واقعے میں گھر سے مزید ایک بچےکی لاش ملی ہے جس کے بعد واقعے میں جاں بحق افراد کی تعداد 11 ہو گئی ہے۔

تفصیلات کے مطابق ایس ایس پی پنوں عاقل عرفان سموں کے مطابق بے رحمی سے گلا کاٹ کر قتل کیے گئے اس گیارہویں بچے کی عمر ایک سال ہے۔

عرفان سموں نے بتایا کہ گھر کے سربراہ ملزم وہاب نے 11 افراد کے خنجر کے وارسے گلے کاٹ ڈالے، مقتولین میں ملزم کی بیوی، 4 بیٹیاں، 3 بیٹے، بہو، پوتی اور پوتا شامل ہیں۔

ایس ایس پی کے مطابق  ملزم نے تمام افراد کو رات سوتے ہوئے قتل کیا، واقعے کی اطلاع ملنے پر فوری کارروائی کرتے ہوئے ملزم کو اس کی رہائش گاہ سے گرفتار کرلیا گیا۔

پولیس کی جانب سے ملزم وہاب سے قتل کی وجہ جاننے کی کوشش کی جا رہی ہے۔

پولیس نے ملزم کے ساتھ اس کے 3 بیٹوں کو بھی گرفتار کیا ہے تاہم اس بات کی تصدیق نہیں ہو سکی ہے کہ ملزم کے بیٹے اس قتل کی واردات میں ملوث ہیں یا نہیں۔

پولیس کے مطابق بظاہر ایسا معلوم ہوتا ہے کہ ملزم وہاب ذہنی مریض ہے۔

اس سے قبل پنو عاقل کے مذکورہ گھر سے ایک ہی خاندان کے 10 افراد کی لاشیں ملی تھیں جنہیں چھریوں کے وار کر کے قتل کیا گیا تھا۔

دوسری جانب وزیرِ اعلیٰ سندھ سید مراد علی شاہ نے پنوعاقل واقعے کا فوری نوٹس لیتے ہوئے آئی جی پولیس سے واقعے کی تفصیلی رپورٹ طلب کر لی ہے۔