وفاقی وزیر برائے صنعت و پیداوار حماد اظہر نے پی ٹی آئی حکومت کی دو سالہ کارکردگی کو تسلی بخش قرار دیتے ہوئے کہا ہے کہ پی ٹی آئی حکومت نے 2 سال میں بروقت ضروری صنعت اور تعمیراتی صنعت کو کھولا۔

اسلام آبادمیں میڈیا کو بریفنگ دیتے ہوئے حماد اظہر نے کہا کہ ہم نے نا صرف ٹیکس فری بجٹ دیا بلکہ ٹیکس کم بھی کیا، کورونا وبا میں پاکستان نے سپلائی چین کو بحال رکھا، کنسٹرکشن کی صنعت کے لیے منفرد پیکج لائے اور اب کنسٹرکشن صنعت میں اضافہ نظر آرہا ہے۔

حماد اظہر نے بتایا کہ 2 سال میں 30 سے 35 لاکھ چھوٹے کاروبار کے 3 ماہ کے بجلی کے بل معاف کیے گئے، پاکستان اسٹیل 236 ارب کے قرضوں پر کھڑی ہے ہم نے اسٹیل ملز کے دیرینہ مسئلے کا حل نکالا۔

انہوں نے بتایا کہ آٹو موبائل کی 20 فیصد سیل زیادہ ہوئی، برآمدات میں اضافہ 6 فیصد ہے اور اب مقامی اسمارٹ موبائل کی برآمدات شروع ہونے والی ہیں۔

حماد اظہرکا یہ بھی کہنا تھا کہ ایف اے ٹی ایف کے پلیٹ فارم پر پہلے ہم پر تنقید ہوتی تھی کہ کچھ کرنہیں رہے لیکن ہم نے ہر ممکن اقدامات کیے۔

اس کے علاوہ ان کا کہنا تھا کہ شوگر ریفارمز کمیٹی وزیراعظم نے تشکیل دی اور پہلی بار شوگر مافیا کے خلاف اقدامات کیے، انہی 2 سالوں میں ملک سے اسمگل شدہ موبائل فون ختم کیے گئے، الیکٹرک وہیکل اور موبائل مینوفیکچرنگ کی پالیسی لے کر آئے اور اسی سال الیکٹرک موٹرسائیکل اور رکشے بننے شروع ہو گئے ہیں۔