یو اےای کی ٹیکنالوجی کمپنی ’لاک اینڈ اسٹاک‘ نے طلبہ کی زندگی بہتر بنانےکے لیے پاکستان میں بھی اپنے منصوبے کا آغاز کردیا ہے۔

لاک اینڈ اسٹاک ایک فری موبائل ایپ ہے جو طلبہ کو ان کے موبائل فونز بند رکھنے کی حوصلہ افزائی کرتی ہے اور بدلے میں انہیں مختلف طرح کے مالی و تعلیمی فوائد اور رعایتیں دی جاتی ہیں۔

طلبہ کو فون بند رکھنے پرفی منٹ ایک ’کی‘ (key) ملتی ہے جس کے ذریعے وہ نہ صرف کھانے پینے کی اشیاء، انٹرٹیمنٹ اور مختلف برانڈز پر ڈسکاؤنٹ حاصل کرسکتے ہیں بلکہ اس کے ذریعے وہ دنیا کی معروف جامعات میں اسکالر شپس بھی حاصل کرسکتے ہیں۔

اس کے علاوہ اس ’کی‘ سے طلبہ کو مختلف اداروں میں نوکری اور انٹرن شپ حاصل کرنے کے مواقع بھی مل سکتے ہیں۔

رپورٹ کے مطابق 2017 میں اس ایپ کا دبئی میں آغاز ہوا اور تب سے اب تک تقریباً 50 ہزار سے زائد طلبہ مجموعی طورپر 558 سال کے برابر وقت آف لائن رہ چکے ہیں۔

لاک اینڈ اسٹاک ایپ کی پروگرامنگ طالب علم کے اسمارٹ فون سے دور رہنے کے وقت کو ٹریک کرتی ہے اور سوشل میڈیا ایپس کے نوٹیفکیشن کو بلاک کردیتی ہے جس سے طالب علم اپنی پسند کی دیگر سرگرمیوں پر وقت صرف کرسکتا ہے۔

اس ایپ میں طالب علموں کے درمیان سب سے زیادہ دیر آف لائن رہنے کا مقابلہ بھی ہوتا ہے زیادہ دیر تک موبائل فون سے دور رہنے والے طالب علم کو ہر ہفتے انعام دیا جاتا ہے۔

’لاک اینڈ اسٹاک‘ کے 23 سالہ شریک بانی اور چیف ایگزیکٹو آفیسر کریگ فرنینڈس کا کہنا ہے کہ ہمارا مقصد طلبہ کی زندگی میں بہتری لانا ہے اور ہم دنیا بھر میں ڈیجیٹل نشے کے خلاف لڑنا چاہتے ہیں۔

طلبہ اپنے اسمارٹ فون کو بند یا اس سے دوررہ کر ڈسکاؤنٹس اور دیگرپیشکشوں سے فائدہ اٹھاسکتے ہیں جبکہ اس کے ساتھ ساتھ طلبہ کے لیے اسکالرشپ پلیٹ فارم بھی متعارف کروایا گیا ہے۔

2019 میں لاک اینڈ اسٹاک کے ذریعے طلبہ نے اسکالر شپس اور فیسوں میں رعایت کی مد میں 5 لاکھ ڈالر سے زائد کی بچت کی جبکہ رواں سال اب تک طالب علم مجموعی طور پر 10 لاکھ ڈالر سے زائد کی اسکالر شپس حاصل چکے ہیں۔

لاک اینڈ اسٹاک ایپ کو گوگل پلے اسٹور اور ایپ اسٹور سے ڈاؤن لوڈ کیا جاسکتا ہے۔