وزیرِ خارجہ محمود قریشی کی جانب سے گستاخانہ خاکوں پر فرانسیسی میگزین چارلی ہیبڈو کی مذمت کی گئی ہے۔

وزیرِ خارجہ نے سماجی رابطے کی ویب سائٹ فیس بک پر اہم ویڈیو پیغام جاری کیا ہے جس میں انہوں نے اسلاموفوبیا کے بڑھتے ہوئے رجحان کے خلاف موقف اختیار کرتے ہوئے کہا ہے کہ وہ اپنی اور حکومتِ پاکستان کی جانب  سے فرانسیسی میگزین چارلی ہیبڈو کی پر زور مذمت کرتے ہیں۔

شاہ محمود نے کہا کہ چارلی ہیبڈو میں شائع کردہ گستاخانہ خاکوں کی وجہ سے کروڑوں مسلمانوں کے جذبات مجروح ہوئے، لوگ مشتعل ہیں، اس بلاجواز حرکت کی جتنی مذمت کی جائے کم ہے۔

شاہ محمود نے کہا کہ اسلاموفوبیا، نسل پرستی اور زینو فوبیا کا رجحان دنیا  بھرمیں بڑھتا چلا جا رہا ہے جس کی جتنی بھی مذمت کی جائے کم ہے، پاکستان نے ہرعالمی فورم پر اس مسئلے کی نشاندہی کی ہے۔

انہوں نے کہا کہ وزیرِاعظم عمران خان نے اقوامِ متحدہ کی جنرل اسمبلی کے اجلاس سے خطاب کرتے ہوئے بھی اس معاملے کی نشاندہی کی اور دنیا سے مطالبہ کیا کہ اس مسئلے کا تدارک ہونا چاہیے۔

انہوں نے کہا کہ بین الاقوامی سطح پر، مل بیٹھ کر یہ سوچنا چاہیے کہ ایسے رجحانات کو کیسے روکا جائے جو دوسروں کے جذبات مجروح کرتے ہوں اور ان کے خلاف بند کیسے باندھا جائے؟