عالمی وبا  کم ہونے کے بعد پاکستان میں چھٹی سے آٹھویں جماعت کے طلبہ کی کلاسز کل سے شروع ہوں گی۔

نیشنل کمانڈ اینڈ آپریشن سینٹر نے دوسرے مرحلے میں تعلیمی ادارے کھولنے کی اجازت دے دی ہے۔  چھٹی سے آٹھویں جماعت کے طلبہ کی کلاسز کل سے شروع ہوں گی۔

وفاقی وزیراسدعمر کی زیرصدارت تعلیمی ادارے کھولنے کے متعلق اجلاس ہوا جس میں وزیر تعلیم شفقت محمود، وزیر داخلہ، صوبائی وزرائے تعلیم، معاون خصوصی صحت اور سیکرٹری تعلیم نے بھی شرکت کی۔

پنجاب، خیبرپختونخوا اور بلوچستان میں چھٹی سے آٹھویں کلاسز کل سے شروع  ہوں گی، سندھ میں مڈل کلاسزکا آغاز28ستمبر سے ہوگا۔

این سی او سی کے اعلان کے بعد وزیرتعلیم خیبرپختونخوا شہرام ترکئی کا کہنا تھا کہ ان کے صوبے میں چھٹی سے آٹھویں تک کلاسز کل سے شروع ہوں گی اور تعلیمی اداروں میں کورونا ایس اوپیز پر عمل درآمد یقینی بنایاجائے گا۔

وزارت تعلیم سندھ کا کہنا ہے کہ انہوں نے دوسرے مرحلے میں اسکول کھولنے کا فیصلہ نہیں کیا اور28 ستمبر سے دوسرے مرحلے میں اسکولز کھولنے کا فیصلہ برقرار ہے۔ انہوں نے کہا کہ اٹھارویں ترمیم کے بعد صوبے خود مختار ہیں۔

خیال رہے کہ حکومت نے ملک بھر میں مرحلہ وار تعلیمی ادارے کھولنے کا فیصلہ کیا تھا۔

 پہلے مرحلے میں یونیورسٹی، میٹرک اور انٹر میڈیٹ کے طالبعلموں کو بلایا گیا تھا،دوسرے مرحلے میں23 ستمبر کو چھٹی سے آٹھویں جماعت کے طلبا کو سکول آنے کی اجازت ہوگی۔ جبکہ تیسرے مرحلے میں تمام پرائمری سکول کے بچوں کو 30 ستمبر سے سکول جائیں گے۔

پہلے مرحلے کے بعد تعلیمی اداروں میں کورونا کیسز رپورٹ ہونے پر ملک بھر میں مجموعی طور پر35 تعلیمی اداروں کو بند کر دیا گیا تھا۔ سندھ کے تعلیمی اداروں میں کورونا کیسز رپورٹ ہونے پر صوبائی حکومت نے چھٹی سےآٹھویں جماعت تک اسکول کھولنے کی تاریخ ایک ہفتہ آگے بڑھا دی ہے۔