انسانی حقوق کی عالمی تنظیم ایمنسٹی انٹرنیشنل کا کہنا ہے کہ بھارت حکومت نے اس کے بینک اکاؤنٹس منجمند کردیے ہیں جس کی وجہ سے اس نے بھارت میں ملازمین کو فارغ کر کے اپنا کام روک دیا ہے۔

تنظیم کی جانب سے جاری بیان میں کہا گیا ہےکہ بھارتی حکومت کی طرف سے انسانی حقوق کی خلاف ورزی کرنے کے خلاف آواز اٹھانے پراسے منظم طریقے سے اور من گھڑت الزمات لگا کر نشانہ بنایا گیا ہے۔

بھارت میں ایمنسٹی انٹرنیشنل کے ایگزیکٹو ڈائریکٹر اویناش کمارنےکہاہےکہ ’گزشتہ دو برس سے ایمنسٹی انٹرنیشنل پر کیا جانے والا کریک ڈاؤن اور اب اس کے اکاؤنٹس کو منجمند کرنا محض اتفاق نہیں ہے۔ یہ دہلی میں ہونے والے ہنگاموں اور جموں و کشمیر میں انسانی حقوق کی سنگین خلاف ورزیوں پر بھارتی حکومت کا احتساب کرنے کا نتیجہ ہے۔‘

تنظیم کا کہنا ہے کہ وہ بھارت اور بین الاقوامی قوانین کی مکمل طور پر پاسداری کرتی ہے اوربھارت میں انسانی حقوق کے حوالے سے کام کرنے کے لیے یہ مقامی طور پر فنڈز اکٹھے کرتی ہے، اوراب تک ایک لاکھ  بھارتی شہریوں نےفنڈزعطیہ کیے ہیں۔

اویناش کمار کا کہنا تھا کہ ’انسانی حقوق کی تنظیموں میں خوف پیدا کرنے کے لیےبھارتی ادارہ انفورسمنٹ ڈائریکٹوریٹ آف انڈیااوربھارتی حکومت انہیں جرائم پیشہ تنظیوں کے طور پر پیش کر رہی ہے۔‘