وزیراعظم عمران خان سے گورنر سندھ عمران اسماعیل کی ملاقات ہوئی جس میں کراچی سمیت سندھ کی سیاسی صورتحال پر گفتگو کی گئی۔

ملاقات میں کراچی میں ترقیاتی کاموں سے متعلق گفتگو کی گئی جبکہ کے فور منصوبے پر جلد عملدرآمد کے حوالے سے امور پر بھی گفتگو کی گئی۔

عمران خان سے ملاقات میں گورنر سندھ نے بلدیہ ٹاؤن فیکٹری سے متعلق فیصلے پر بھی بریفنگ دی۔

گورنر سندھ عمران اسماعیل نے کہا کہ صوبہ سندھ اور خصوصاً کراچی کے عوام وزیراعظم  کی صوبے کی ترقی و خوشحالی کے حوالے سے کاوشوں کو سرا رہے ہیں۔

وزیراعظم عمران خان نے کہا کہ صوبہ سندھ کے سیلاب سے متاثر ہونے والے علاقوں میں عوام کی ضروریات کو پورا کرنے کے حوالے سے ہر ممکن اقدامات اٹھائے جائیں۔

وزیراعظم عمران خان سے گورنر سندھ عمران اسماعیل کی ہونے والی ملاقات میں ممبر صوبائی اسمبلی سندھ حلیم عادل شیخ اور سیف اللہ نیازی بھی شریک ہوئے۔

واضح رہے اس سے قبل وزیراعظم عمران خان کی زیر صدارت وفاقی کابینہ کا اجلاس ہوا جس میں وزیراعظم نے اسلام آباد میں گرین ایریا پر جیل کی تعمیر پرناراضگی کا اظہار کیا جبکہ ملکی تازہ سیاسی, معاشی اور سلامتی کی صورت حال پرغورکیا گیا۔

اجلاس میں وفاقی کابینہ میں ریپ کے ملزمان کے لئے سخت سزاؤں پر مبنی قوانین کا بھی جائزہ لیا گیا جبکہ ایس ای سی پی ڈیٹا لیک معاملے پر بھی بحث کی گئی۔

اس موقع پرخواتین و بچوں کے تحفظ سے متعلق بل کے مسودے پر بابر اعوان اور شہزاد اکبر نے بریفنگ دی جس پروزیراعظم عمران خان نے کہا تھا کہ بل فوری طور پر کابینہ کمیٹی برائے قانونی سازی میں لایا جائے جبکہ عورتوں اور بچوں سے جنسی جرائم میں ملوث مجرمان کو سخت سزائیں دیں گے۔